{"id":53362,"date":"2023-05-29T14:00:28","date_gmt":"2023-05-29T12:00:28","guid":{"rendered":"https:\/\/novanews.co.za\/noordkaapbulletin\/waterkrisis-in-warrenton-vererger-na-vragmotor-omslaan-20230529-2\/"},"modified":"2025-03-21T15:03:59","modified_gmt":"2025-03-21T13:03:59","slug":"waterkrisis-in-warrenton-vererger-na-vragmotor-omslaan-20230529-2","status":"publish","type":"post","link":"https:\/\/novanews.co.za\/noordkaapbulletin\/waterkrisis-in-warrenton-vererger-na-vragmotor-omslaan-20230529-2\/","title":{"rendered":"Waterkrisis in Warrenton vererger n\u00e1 vragmotor omslaan"},"content":{"rendered":"\n
\n
\"\"

<\/p>\n

Stukkende watertenks l\u00ea laatmiddag van Sondag 28 Mei by die afdraai na Warrenton se waterwerkaanleg. Die kennisgewingbord waarteen dit l\u00ea, dui die opgradering en uitbreiding van die aanleg aan. Volgens die bord dateer die projek uit vroeg 2020, met 12 maande as die tydsduur van die projek aangedui. <\/div>\n
<\/span>Foto: Helena Barnard<\/span> <\/div>\n<\/div>\n<\/div>\n\n\n\n

\u2019n Vragmotor wat gebruik word om water na inwoners van Warrenton te vervoer, het laatmiddag op Vrydag 26 Mei omgeslaan.<\/p>\n\n\n\n

Die twee watertenks wat agter-op die vragmotor was, is in stukke en totaal onbruikbaar.<\/p>\n\n\n\n

Dit vergroot die waterkrisis in di\u00e9 Noord-Kaapse dorp langs die Vaalrivier wat op sulke vragmotors en \u201ceie planne\u201d, aangewese is om water te kry. <\/p>\n\n\n\n

Die ongeveer 25 000 inwoners is reeds sedert einde Februarie sonder lopende water nadat \u2019n deel van die hoofwatertoevoerpyp in die vloed beskadig is. Die pyp strek vanaf die waterwerkaanleg noord van die dorp, deur die Vaalrivier, na die dorp. <\/p>\n\n\n\n

Sedertdien het vier vragmotors, wat watertenkwaens en vragmotors met watertenks agter-op insluit, water na inwoners vervoer. Die vragmotors behoort aan die Magareng-munisipaliteit en \u2019n kontrakteur.<\/p>\n\n\n\n

Volgens die inwoners is van die vragmotors gereeld buite-werking, met slegs een of twee wat water verskaf. Verlede week, tydens \u2019n besoek aan die dorp, het van die inwoners vertel dat hulle tot drie weke vir die aflewering van water kan wag. <\/p>\n\n\n\n

Volgens Thapelo Jacobs van die Magareng-munisipaliteit het die insittendes van die vragmotor slegs geringe beserings tydens die ongeluk opgedoen. <\/p>\n\n\n\n

Hy het die bespiegelinge dat die bestuurder onder die invloed van alkohol was, ontken. Die vragmotor wat omgeslaan het, behoort aan die kontrakteur. <\/p>\n\n\n\n

Volgens hom is daar drie vragmotors beskikbaar om water aan die verskillende dorpswyke te verskaf. <\/p>\n\n\n\n

Sondag laatmiddag was daar verskeie klein brande op die oop stukke veld in en om Warrenton. \u2019n Vraag het ontstaan oor hoe die dorp brande sal blus terwyl lopende water of \u2019n mobiele brandbestryder met \u2019n ho\u00ebdrukpomp nie beskikbaar is nie. <\/p>\n\n\n\n

Hierop het Jacobs ges\u00ea dat die Frances Baard-distriksmunisipaliteit in sulke gevalle uithelp.<\/p>\n\n\n\n

\u2019n Ingeligte inwoner van die dorp s\u00ea egter dat ook \u201cbrandweersake\u201d in Warrenton \u2019n \u201cteer sakie\u201d is. Volgens die persoon spring individue van die dorp en onmiddellike omgewing gewoonlik in wanneer \u2019n brand bestry moet word. <\/p>\n\n\n\n

Jacobs het voorts ges\u00ea dat die munisipaliteit die aangewese kontrakteur sal aans\u00ea om onverwyld die tydelike en permanente plan vir die herstel van watertoevoer na die dorp uit te voer. <\/p>\n\n\n\n