{"id":50893,"date":"2023-10-05T09:39:10","date_gmt":"2023-10-05T07:39:10","guid":{"rendered":"https:\/\/novanews.co.za\/noordkaapbulletin\/herlaaistasies-vir-elektriese-voertuie-langs-hoofroetes-beplan-20231005\/"},"modified":"2025-03-21T15:45:31","modified_gmt":"2025-03-21T13:45:31","slug":"herlaaistasies-vir-elektriese-voertuie-langs-hoofroetes-beplan-20231005","status":"publish","type":"post","link":"https:\/\/novanews.co.za\/noordkaapbulletin\/herlaaistasies-vir-elektriese-voertuie-langs-hoofroetes-beplan-20231005\/","title":{"rendered":"Herlaaistasies vir elektriese voertuie langs hoofroetes beplan"},"content":{"rendered":"\n

Talle dorpe, padstalle en ander liggings langs hoofroetes in die Noord-Kaap is van die punte waar sonkrag-aangedrewe herlaaistasies vir elektriese voertuie (EV\u2019s) beplan word.<\/p>\n\n\n\n

\n
\"\"

<\/p>\n

\u2019n Voorstelling van \u2019n herlaaistasie. <\/div>\n
<\/span>Foto: Verskaf<\/span> <\/div>\n<\/div>\n<\/div>\n\n\n\n

Met al hoe meer motorvervaardigers wat volgens spesifieke mikpunte die produksie van binnebrandenjins afskaal, word die inwerkingstelling en gebruik van EV\u2019s al meer \u2019n werklikheid.<\/p>\n\n\n\n

Vanwe\u00eb die internasionaal ge\u00efntegreerde verskaffingsketting van voertuie sal dit ongetwyfeld na Suid-Afrika uitkring.<\/p>\n\n\n\n

Gedagtig aan onder meer afhanklikheid aan Eskom se beurtkragskedule en herlaaistasies wat nog net hier en daar in stede beskikbaar is, is EV\u2019s nog nie \u2019n konsep waarmee Suid-Afrikaners gemaklik voel nie.<\/p>\n\n\n\n

Joubert Roux, mede-stigter en direkteur van Zero Carbon Charge, is egter van mening dat sodra daar \u2019n doeltreffende en meer beskikbare herlaainetwerk oor die land heen beskikbaar is, die gebruik van EV\u2019s om verskeie redes sal toeneem.<\/p>\n\n\n\n

\n
\"\"

<\/p>\n

Joubert Roux, medestigter en direkteur, en Larissa Venter, prosesbestuurder, van Zero Carbon Charge.<\/div>\n
<\/span>Foto: Helena Barnard<\/span> <\/div>\n<\/div>\n<\/div>\n\n\n\n

Op \u2019n inligtingsessie op Dinsdagoggend 3 Oktober in Kimberley het Roux ges\u00ea dat Charge daarna mik om \u2019n netwerk van herlaaistasies vir EV\u2019s langs die land se belangrikste hoofpaaie op te rig \u2013 wat sonkrag-aangedrewe gaan wees, en onafhanklik van Eskom.<\/p>\n\n\n\n

Roux s\u00ea meer as 120 liggings oor die land heen is reeds vir herlaaistasies identifiseer, waarvan talle in die Noord-Kaap is. Die doelwit is om teen September 2025 di\u00e9 aantal herlaaistasies in werking te h\u00ea, met meer wat volg. <\/p>\n\n\n\n

\u201cCharge se mark is buite die stadsgebiede,\u201d s\u00ea Roux. <\/p>\n\n\n\n

\u201cHierdie sonkrag-aangedrewe herlaaistasies langs hoofroetes van die land gaan \u2019n fundamentele verandering meebring, met die opwekking van energie wat plaaslik plaasvind.\u201d<\/p>\n\n\n\n

\n
\"\"

<\/p>\n

Van die punte in die land waar herlaaistasies beplan word. Talle hiervan is nie in dorpe of stede nie, maar onder meer by padstalle.<\/div>\n
<\/span>Foto: Verskaf<\/span> <\/div>\n<\/div>\n<\/div>\n\n\n\n

\u2019n Herlaaistasie hou ekonomiese voordele vir elke ligging in, s\u00ea hy.<\/p>\n\n\n\n

Charge beoog om binne \u2019n afstand van 150 km vanaf \u2019n vorige punt \u2019n herlaaistasie te h\u00ea. By di\u00e9 herlaaistasies sal herlaaiing baie vinnig plaasvind, vinniger as dit wat tans elders beskikbaar is. Die voertuigeienaar sal die herlaaiproses op \u2019n app op sy selfoon kan moniteer, met die betaling wat ook elektronies geskied.<\/p>\n\n\n\n

Ruimte word vereis om genoeg sonpanele vir \u2019n herlaaistasie op te rig, en daarom word vennootskappe met grondeienaars of eienaars van gewilde langpad-stilhouplekke aangegaan. By elke herlaaistasie sal kleedkamers en \u2019n bestaande onderneming soos \u2019n padstal wees. <\/p>\n\n\n\n

Ongeag uitdagings in die regulatoriese omgewing, \u201cveg ons dit van loopgraaf tot loopgraaf,\u201d s\u00ea Roux, met private grondeienaars, munisipaliteite, staatsdepartemente en meer wat betrokkenes in die proses is.<\/p>\n\n\n\n

Oprigting van die eerste herlaaistasies sal laat vanjaar of vroeg volgende jaar begin. <\/p>\n\n\n\n

Die eerste drie herlaaistasies is in die Wes-Kaap; by Atlantis, Piketberg en Tulbagh. Die vierde herlaaistasie gaan by Wolmaransstad opgerig word, met nog wat langs di\u00e9 besige N12-roete beplan word. Die proses van goedkeuring en permitte is reeds aan die gang.<\/p>\n\n\n\n

Volgens Roux koop \u2019n bekende busdiensmaatskappy in Kaapstad reeds net elektries-aangedrewe busse aan wanneer \u2019n bus vervang moet word. Di\u00e9 busdiens beplan ook onder meer om sy depots se afdakke met sonpanele toe te rus. <\/p>\n\n\n\n

Al hoe meer koeriermaatskappye en supermarkgroepe beproef ook die gebruik van EV\u2019s. <\/p>\n\n\n\n

Francois Williams<\/span> berig op Netwerk24 dat dit onafwendbaar is dat internasionale motor\u00advervaardigers na EV\u2019s oorskuif. Hulle word bykans gedwing sodat hulle nie hul markaandeel wat oor die afgelope eeu opgebou is aan nuwe vervaardigers soos Tesla afstaan nie, skryf hy. <\/p>\n\n\n\n