{"id":44868,"date":"2024-12-20T09:17:07","date_gmt":"2024-12-20T07:17:07","guid":{"rendered":"https:\/\/novanews.co.za\/noordkaapbulletin\/skaaptrek-te-voet-is-avontuur-soos-geen-ander-20241022-2\/"},"modified":"2025-03-21T16:54:55","modified_gmt":"2025-03-21T14:54:55","slug":"skaaptrek-te-voet-is-avontuur-soos-geen-ander-20241022-2","status":"publish","type":"post","link":"https:\/\/novanews.co.za\/noordkaapbulletin\/skaaptrek-te-voet-is-avontuur-soos-geen-ander-20241022-2\/","title":{"rendered":"Skaaptrek te voet is avontuur \u2018soos geen ander\u2019"},"content":{"rendered":"\n

\u2019n Staptog soos geen ander, waar elke dag \u2019n avontuur is om agter honderde skape aan te stap terwyl \u2019n mens jou verbintenis met die natuur herontdek, word beleef tydens die somer- en winterskaaptrek wat lede van die publiek nou saam met \u2019n boer en sy vrou van die Loeriesfontein-omgewing kan meemaak.<\/p>\n\n\n\n

\u201cOns doen dit omdat dit vir ons lekker is,\u201d vertel CJ Badenhorst van die plaas Klein Dikpens in die Boesmanland, ongeveer 105\u2009km van Loeriesfontein, die naaste dorp.<\/p>\n\n\n\n

Vanjaar het hulle tydens die Op Vakansie Boerdery se winterskaaptrek lede van die publiek saamgeneem. Voorheen was dit nog net vriende en familie wat dit meegemaak het. <\/p>\n\n\n\n

Oor die unieke konsep vertel Badenhorst dat hy al baie lank \u2019n gedagte het om dit te doen, want vir \u201cmy wat skaaptrekke nie geken het nie, was my eerste trek absoluut \u2019n unieke ervaring wat ek nooit sal vergeet nie. <\/p>\n\n\n\n

\u201cEk wil dit graag met ander deel. My vrou het nog altyd gekeer omdat sy onseker was of ons deur alle uitdagings wat \u2019n trek soms kan inhou nog vir vreemde mense wat dit glad nie ken nie, kan regstaan, en omdat geriewe primitief is.\u201d<\/p>\n\n\n\n

\n
\"\"

<\/p>\n

Die Badenhorst-egpaar van die Loeriesfontein-omgewing se kinders maak telkens die skaaptrek mee. <\/div>\n
<\/span>Foto: Facebook\/Op Vakansie Boerdery<\/span> <\/div>\n<\/div>\n<\/div>\n\n\n\n

Maar die afgelope winter het lede van die publiek hierby aangesluit, en saam met die skape oor ongeveer 180\u2009km te voet getrek vanaf die somer- na winterweiding. Dit het 12 dae geduur. <\/p>\n\n\n\n

Eersdaags, in November, vind die somer\u00adskaaptrek plaas, en di\u00e9 avontuur kan teen betaling meegemaak word. <\/p>\n\n\n\n

\u201cDis \u2019n spanpoging tussen my en Lizri om alles mooi te laat verloop. Natuurlik deel ons twee kindertjies in die avontuur. Elena het vanjaar haar vyfde verjaarsdag tydens die winterskaaptrek gevier en Andr\u00e9 word drie jaar oud tydens die somertrek in November. My skoonpa kom kuier gewoonlik tydens \u2019n skaaptrek. Hy is \u2019n bobaas\u00adstorieverteller,\u201d vertel Badenhorst.<\/p>\n\n\n\n

Skape bepaal die pas<\/strong><\/h3>\n\n\n\n

Vanjaar se somerskaaptrek duur twee weke, en word in twee gedeel met die skape wat vir twee dae in die middel van die trek rus. Die eerste deel is van 4 tot 11 November, en die tweede van 13 tot 20 November. <\/p>\n\n\n\n

Die trek met ongeveer 800 skape begin op die plaas Gemsbokrivier in die Knechtsvlak, wat deel van Namakwaland is, na die plaas Dikpens in die Boesmanland. Daar word deur die Soutrivier getrek, verby dadelboorde, wat soos \u2019n oase in die dro\u00eb landskap lyk, verby Lospersplaas en dieper die Boesmanland in.<\/p>\n\n\n\n

Die skape bepaal die pas waarteen gestap word, maar ongeveer 15\u2009km word per dag gestap. <\/p>\n\n\n\n

\u201cOns trek hoofsaaklik op openbare \u2018groot\u2019 grondpaaie, maar soms moet ons deur \u2019n boer se plaas trek, wat vooraf gere\u00ebl word,\u201d vertel Badenhorst. <\/p>\n\n\n\n

\n
\"d\"

<\/p>\n

<\/span>Foto: Facebook\/Op Vakansie Boerdery<\/span> <\/div>\n<\/div>\n<\/div>\n\n\n\n

Soggens word vroeg weggespring, sodra dit lig word. Oor die hitte van die dag word gerus en namiddae word gestap tot waar kamp opgeslaan word. Mense wat die trek meemaak, hoef nie die hele pad te stap nie; twee voertuie is beskikbaar vir wanneer iemand moeg word, en om bagasie te vervoer.<\/p>\n\n\n\n

\n
\u201cOns jaag nie die skape aan nie, ons jaag net die \u2018agterosse\u2019 bietjie aan om hulle by die trop te hou. Die skape stap teen hul eie pas. Hulle loop vreeslik stadig of gaan staan selfs as hul moeg is.\u201d<\/div>\n
CJ Badenhorst<\/div>\n<\/div>\n\n\n\n

\u201cAs lammertjies saamtrek, sien \u2019n mens baie duidelik wanneer hulle moeg word en agter raak. Dan gee ons hulle maar \u2019n saamrygeleentheid.\u201d <\/p>\n\n\n\n

Die eerste dag of twee word die skape effens terug gehou, want hulle is dan vol energie en kan maklik te ver loop en voetseer kry.<\/p>\n\n\n\n

Tydens \u2019n trektog stap die skape glo min of meer dieselfde afstand per dag as wanneer hulle \u2019n volle dag in die veld wei. Omdat hulle so wei-wei aanstap, vreet hulle meestal genoeg. <\/p>\n\n\n\n

Waterpunte word vooraf met boere gere\u00ebl.<\/p>\n\n\n\n

\u201cDie boere is oor die algemeen vreeslik gaaf, so ons is baie dankbaar daarvoor,\u201d s\u00ea Badenhorst.<\/p>\n\n\n\n

\n
\"\"

<\/p>\n

<\/span>Foto: Facebook\/Op Vakansie Boerdery<\/span> <\/div>\n<\/div>\n<\/div>\n\n\n\n

Daar word gepoog om die skape elke aand in \u2019n soort kraal te laat slaap, maar dit is nie altyd moontlik nie. Dan is dit \u201cboer maak \u2019n plan.\u201d <\/p>\n\n\n\n

\u201cOns maak byvoorbeeld \u2019n hek voor hulle toe en slaan ons tentjies in \u2019n ry agter hulle op. Of ons laat staan hulle en vat skofte om hulle op te pas sodat hulle nie wegloop nie. <\/p>\n\n\n\n

\u201cSkape leer vinnig dat hulle snags moet l\u00ea en nie rondloop nie. Jakkalse is darem nie \u2018n probleem tydens ons trekke nie.\u201d<\/p>\n\n\n\n

Die vier skaaphonde wat altyd saamgaan, help ook om die skape in toom te hou.<\/p>\n\n\n\n

\u201cEk het in die Noordwes grootgeword, maar hierdie w\u00eareld het my hart gesteel. Ek het dit glad nie geken om te trek nie, maar dis in \u2019n mens se bloed! Alles wat ek van trek weet het ek by my skoonpa en deur ondervinding geleer. Hy is op die trekpad gebore,\u201d vertel Badenhorst. <\/p>\n\n\n\n

\n
\"s\"

<\/p>\n

<\/span>Foto: Facebook\/Op Vakansie Boerdery<\/span> <\/div>\n<\/div>\n<\/div>\n\n\n\n

Skaaptrek skakel probleme uit<\/strong><\/p>\n\n\n\n

Badenhorst vertel dat die beskikbaarheid van weiding hoofsaaklik deur die re\u00ebnval bepaal word. Die meeste boere in die omgewing verskuif hul skape in die winter na winterweiding en in die somer terug na die somerre\u00ebnvalstreek toe. <\/p>\n\n\n\n

\u201cMaar dit word uitsluitlik deur die beskikbare weiding bepaal. Dit is byvoorbeeld nie die moeite werd om die skape na die winterplaas te skuif as daar nie weiding is nie. <\/p>\n\n\n\n

\u201cDan voer ons eerder die skape op die plaas waar hulle is, sou dit nodig wees.\u201d<\/p>\n\n\n\n

Die verskillende troppe skape word ook nie altyd almal saam geskuif nie. Indien dit wel gedoen word, word al die ooie en lammers bymekaar geplaas en word die ramme uitgehaal. Die ramme word dan n\u00e1 die tyd gaan haal. <\/p>\n\n\n\n

\n
\u201cSoms tydens die skaaptrek is daar \u2019n ooi wat lam en dan is ons genoodsaak om \u2019n bietjie met die skape te rus en die ooi kans te gee om te lam, die lammetjie skoon te lek, en te laat drink.\u201d<\/div>\n
CJ Badenhorst<\/div>\n<\/div>\n\n\n\n

\u201cHoe sterk die lammetjie is verskil van lam tot lam en of die ooi vet of skraal is. As \u2018n ooi skraal is, is die lammetjie gewoonlik meer verbog. <\/p>\n\n\n\n

\u201cParty lammetjies kan \u2019n gedeelte van die dag saamloop, ander moet eers \u2019n dag of twee saamry. <\/p>\n\n\n\n

\u201cOns laai die lammers op en in die middae en saans gee ons hulle vir die ooie. Dis nogal soms \u2019n missie om ma en kind bymekaar te kry tussen al daardie skape!\u201d<\/p>\n\n\n\n

Badenhorst is van mening dat om die skape op di\u00e9 manier te verskuif, teen \u2019n pas wat die diere bepaal, sekere probleme uitskakel soos ooie wat die lammetjies verwerp, en ooie wat in vroe\u00eb dragtigheid die fetusse herabsorbeer. <\/p>\n\n\n\n

\n
\"d\"

<\/p>\n

<\/span>Facebook\/Op Vakansie Boerdery<\/span> <\/div>\n<\/div>\n<\/div>\n\n\n\n

Slaan eie tentjie op<\/strong><\/p>\n\n\n\n

Die enigste verpligting wat stappers het is om hul tent op en af te slaan, maar hulle is welkom om te help waar nodig, soos met kosmaak.<\/p>\n\n\n\n

Tydens die trek is geen vaste roetine nie. Die belangrikste is dat die skape reg is om te loop sodra dit lig word soggens, veral in die somer waar dit in die middae baie warm is. <\/p>\n\n\n\n

Stappers moet beddegoed (kussing en slaapsak); gemaklike klere (ook warm klere); stapskoene; hoed (\u2019n pet word voorsien); klein rugsakkie vir jou waterbottel; kopliggie of flits; handdoek; toiletware; en peuselhappies saamneem. <\/p>\n\n\n\n

\u2019n Tentjie met \u2019n matrassie; stoele; eetgerei; ontbytgraan, koffie of tee en beskuit in die oggend; middag- en aandete; vrugte, soos verkrygbaar; water, koffie, tee (Engels en rooibos) en aanmaaksap; toiletpapier (geen toiletgeriewe; \u201cbossies toe gaan\u201d); en skottel en kampstorte word verskaf. <\/p>\n\n\n\n

Daar is geen geriewe om wasgoed te was nie, maar \u2019n skotteltjie en waspoeier is beskikbaar om iets met die hand uit te spoel. <\/p>\n\n\n\n

In die aande word rondom die kampvuur gekuier, in die oggend word die sonsopkoms waardeer, en dwarsdeur die dag die rustigheid en natuurskoon.<\/p>\n\n\n\n

Stappers word in Loeriesfontein afgehaal waar veilige parkering vir voertuie is. <\/p>\n\n\n\n

N\u00e1 die trek word hulle terug na hul voertuie geneem. <\/p>\n\n\n\n

Stuur \u2019n boodskap of WhatsApp na 073-675-2078 of besoek Op Vakansie Boerdery <\/a>op Facebook vir meer inligting. <\/p>\n\n\n\n