{"id":295159,"date":"2025-12-01T17:05:14","date_gmt":"2025-12-01T15:05:14","guid":{"rendered":"https:\/\/novanews.co.za\/noordkaapbulletin\/gevalle-van-slenkdalkoors-in-dele-van-noord-kaap-bevestig\/"},"modified":"2025-12-01T20:08:13","modified_gmt":"2025-12-01T18:08:13","slug":"gevalle-van-slenkdalkoors-in-dele-van-noord-kaap-bevestig","status":"publish","type":"post","link":"https:\/\/novanews.co.za\/noordkaapbulletin\/gevalle-van-slenkdalkoors-in-dele-van-noord-kaap-bevestig\/","title":{"rendered":"Gevalle van Slenkdalkoors in dele van Noord-Kaap bevestig"},"content":{"rendered":"\n

NOORD-KAAP <\/strong>– Gevalle van Slenkdalkoors is deur die Noord-Kaapse Direktoraat van Veeartsenydienste in di\u00e9 provinsie bevestig. Die voorkoms van Slenkdalkoors wat onder ‘n aantal skape in die Kakamas- en Augrabies-omgewing vermoed is, is deur die veterin\u00eare navorsingslaboratorium by Onderstepoort bevestig.<\/p>\n\n\n\n

Slenkdalkoors is \u2019n ernstige insekgedraagde virussiekte wat onder hoefdiere soos skape, bokke en beeste voorkom en wat \u2019n groot gesondheidsgevaar vir die mens inhou. Die voorkoms van di\u00e9 siekte volg weens \u2018n toename in muskiete n\u00e1 die onlangse re\u00ebn. Diere wat in die somer in laagliggende dele by panne, vleie en damme wei, het die grootste risiko om die siekte te kry.<\/p>\n\n\n\n

In ‘n verklaring op 14 November het die direktoraat boere versoek om skape, bokke en beeste as ‘n voorsorgmaatre\u00ebl in te ent en alle moontlike veiligheidsmaatre\u00ebls met die hantering van siek diere en besmette karkasse te volg.<\/p>\n\n\n\n

Simptome by diere<\/h3>\n\n\n\n

Volgens TLU SA word diere aanvanklik besmet as hulle deur die muskiete wat die virus dra, gebyt word. Hierna word die diere direk besmet wanneer hulle aan geaborteerde fetusse en besmette materiaal of weefsel blootgestel word.<\/p>\n\n\n\n

Siektetekens onder diere sluit koors, aborsies, swakheid en lam- of kalfvrektes in. <\/p>\n\n\n\n

Lammers van skape en bokke onder die ouderdom van twee weke is baie vatbaar. Hulle word baie gou siek, gewoonlik binne 24 tot 72 uur n\u00e1 besmetting. \u2019n Ho\u00eb koors ontwikkel, hulle is lusteloos en verloor eetlus. Tot 95% van aangetaste lammers kan vrek.<\/p>\n\n\n\n

Skape is lusteloos, met \u2019n ho\u00eb koors, traag om te loop, eet nie en gooi op. Dragtige ooie aborteer en die fetus ontbind gou. Vrektes onder skape is so hoog as tussen 15% tot 30% en tussen 40% en 60% van dragtige ooie kan aborteer.<\/p>\n\n\n\n

By kalwers kom ligte kliniese tekens en 10% tot 15% vrektes voor. By volwasse beeste is die 10% tot 40% aborsies wat voorkom soms die enigste siektetekens.<\/p>\n\n\n\n

Slenkdalkoors by mense<\/h3>\n\n\n\n

Mense raak gewoonlik deur regstreekse aanraking met die Slenkdalkoorsvirus besmet wanneer hulle nadoodse ondersoeke op besmette karkasse of geaborteerde fetusse doen of in laboratoriums met die virus werk. Die virus dring \u2019n mens se liggaam deur slymvliese of wonde in die vel in. Boere, veeartse en plaaswerkers, wat direk met di\u00e9 diere werk, het die grootste risiko om Slenkdalkoors op te doen. <\/p>\n\n\n\n

Simptome van Slenkdalkoors by mense sluit griepsimptome soos koors, hoofpyn, spierpyn, gewrigpyn, swakheid, naarheid, buikongemak en ligsensitiwiteit in. Met komplikasies kan onder meer gedeeltelike of algehele blindheid, en ‘n vorm van meningitis intree. Sterftes beloop sowat 0,5%.<\/p>\n\n\n\n

In die algemeen herstel mense gewoonlik binne vier tot sewe dae. <\/p>\n\n\n\n

Voorkoming<\/h3>\n\n\n\n

Waar moontlik moet muskietbeheer toegepas word deur die dreinering van stilstaande water en die gebruik van insekdoders. Inenting by diere is egter die mees effektiewe beheermaatre\u00ebl.<\/p>\n\n\n\n

Verskuif diere van laer- na ho\u00ebrliggende dele en voorkom dat kuddes naby vleie, damme en riviere wei waar baie muskiete is. Dipmiddels wat effektief teen bytende insekte is mag ook oorweeg word.<\/p>\n\n\n\n

Persone wat met siek diere of besmette karkasse werk, word ten sterkste aangeraai om beskermende klere te dra. Mense kan met die virus besmet<\/a> word deur kontak of aanraking met die besmette diere of karkasse se neusuitloopsels, bloed, afskeiding n\u00e1 aborsie, besmette vleis en die inname van ongepasteuriseerde melk. Voorkom muskietbyte waar moontlik – gebruik muskietafweermiddels.<\/p>\n\n\n\n

Weefsel en ander materiaal, soos geaborteerde fetusse en plasentas, moet diep begrawe of verbrand word. <\/p>\n\n\n\n

Agtergrond<\/h3>\n\n\n\n

Die virus is die eerste keer<\/a> in 1930 tydens \u2019n epidemie onder skape in die Slenk- of Skeurdalgebied (Rift Valley) in Kenia ge\u00efsoleer. Die siklusse in die voorkoms van die siekte word grootliks deur re\u00ebnval bepaal. Uitbrekings kan verwag word in jare met goeie re\u00ebn wat gunstige toestande vir die oorlewing van die virus in\u00a0Aedes<\/em>-muskieteiers skep. <\/p>\n\n\n\n

Die Slenkdalkoors-virus oorleef in di\u00e9 eiers, wat meebring dat muskiete wat uitbroei klaar met die virus besmet is. As sulke muskiete vee byt, dra hulle die virus oor en di\u00e9 diere dien as bron van virusse om honderde ander\u00a0Aedes<\/em>-muskietwyfies te besmet, wat dit weer deur hul eiers aan hul nageslag oordra.<\/p>\n\n\n\n