{"id":58026,"date":"2018-06-14T06:02:37","date_gmt":"2018-06-14T04:02:37","guid":{"rendered":"https:\/\/novanews.co.za\/kougaexpress\/helen-wil-ander-met-haar-storie-help-20180613-2\/"},"modified":"2025-03-20T17:43:23","modified_gmt":"2025-03-20T15:43:23","slug":"helen-wil-ander-met-haar-storie-help-20180613-2","status":"publish","type":"post","link":"https:\/\/novanews.co.za\/kougaexpress\/helen-wil-ander-met-haar-storie-help-20180613-2\/","title":{"rendered":"Helen wil ander met haar storie help"},"content":{"rendered":"\n

HELEN Hugo (33), \u2019n ma van vier jong kinders, lei \u2019n gesonde en aktiewe leefstyl op die kusdorp Jeffreysbaai.<\/p>\n\n\n\n

\u201cMy lewe het letterlik gaan stilstaan,\u201d s\u00ea sy oor die dag \u2013 <\/p>\n\n\n\n

16 November 2017 \u2013 toe kolonkanker by haar gediagnoseer is. <\/p>\n\n\n\n

\u201cHierdie soort kanker word gewoonlik by mense wat ouer as 50 is, onaktief is en \u2019n ongesonde leefstyl volg, gediagnoseer. Alles wat ek nie is of doen nie.\u201d <\/p>\n\n\n\n

Sedert sy kan onthou, sukkel Helen met erge maagpyn en sy het altyd pynmedisyne byderhand gehad. <\/p>\n\n\n\n

Tydens haar derde en laaste swangerskap (een van hul kinders is uit haar man, Paul, se vorige huwelik) het die pyn erger geword, maar sy het dit aan aambeie toegeskryf en was glad nie bekommerd nie. <\/p>\n\n\n\n

Ongeveer \u2019n jaar n\u00e1 die geboorte van haar jongste kind het die pyn erger geword. Dit is toe dat sy besluit het om \u2019n dokter te sien, wat haar weer na \u2019n kolorektale spesialis en gastro\u00ebnteroloog verwys het. <\/p>\n\n\n\n

Daar is bevestig dat sy kolonkanker het.<\/p>\n\n\n\n

\n Die aanpassings <\/b>\n<\/p>\n\n\n\n

N\u00e1 28 chemo- en bestralingsessies is tien van haar limfkliere, haar rektum en 20 cm van haar kolon verwyder. <\/p>\n\n\n\n

Sy moet nou vir vier tot ses Oxaliplatin chemosiklusse gaan voordat die omkeeroperasie, die verwydering van die ileostomiesakkie, gedoen kan word. <\/p>\n\n\n\n

Van moed opgee is daar nie sprake nie. Sy is positief, al was daar \u2019n tyd wat sy nie meer wou lewe nie. <\/p>\n\n\n\n

Vandag kies sy om eerder die sonkant van die lewe raak te sien, al het die werklike stryd en leefstylaanpassings nou eers begin. <\/p>\n\n\n\n

\u201cNiks kan jou vir die ileostomiesakkie voorberei nie. Dit wat binne jou liggaam moet wees, is nou buite reg langs jou naeltjie \u2013 afgeknoop soos \u2019n tuinslang. <\/p>\n\n\n\n

\u201cEk was vreeslik depressief. Dit het gevoel asof my hele lewe om di\u00e9 sakkie draai. <\/p>\n\n\n\n

\u201cDit knou jou selfvertroue en is soos \u2019n derde persoon in jou huwelik. <\/p>\n\n\n\n

\u201cGelukkig het ons geleer om in die slaapkamer daaroor te lag \u2013 jy moet. En my man weet waar privaatheid nodig is.\u201d<\/p>\n\n\n\n

\n
\n Selfbejammering taboe<\/span>
\n <\/b>\n<\/p>\n\n\n\n

Helen weet sy is nie die enigste een in die gesin wat deur hierdie terugslag geraak word nie; dit raak ook haar kinders Ruach (1), Benrhu (4), Elanie (5), Leandri (8) en Paul. <\/p>\n\n\n\n

\u201cDit is belangrik om vir my kinders deur die proses te wys dat \u2019n mens sterk moet wees en nie jouself jammer kry nie. Ek wil hulle leer om sterk te wees.\u201d <\/p>\n\n\n\n

Helen, wat drie keer \u2019n dag twee antidiarreetablette moet drink om te voorkom dat sy dehidreer, frons: \u201cEk sal nooit weer te gesond kan eet soos voor die operasie nie, sulke kos verteer te vinnig en kan diarree tot gevolg h\u00ea \u2013 dit het my al onlangs twee dae lank in die hospitaal laat beland.\u201d <\/p>\n\n\n\n

\n Sy lewe van stylsel: Aartappels, patats en botterskorsies. Iets wat di\u00e9 gesondheid- en fiksheidsverslaafde dwars in die krop steek<\/span>. <\/p>\n\n\n\n

\n Boontjies, broccoli en blomkool is uit, terwyl kerrie en speseryagtige kosse vermy moet word. Wortels, mielies, sampioene, neute en sade verteer nie en kom heel anderkant uit<\/span>. <\/p>\n\n\n\n

Sy moet ook versigtig wees vir kosse wat \u2019n reuk afgee soos vis en eiers, en sy kan nie iets inneem wat gas veroorsaak nie, of die sakkie blaas op soos \u2019n ballon en raas. <\/p>\n\n\n\n

\u201cDit is soos \u2019n wind wat jy nie kan knyp nie,\u201d verduidelik <\/p>\n\n\n\n

Helen laggend. <\/p>\n\n\n\n

Dan moet sy ook genoeg vloeistowwe en elektroliete deur die dag inneem. <\/p>\n\n\n\n

\n Benewens die kophou met wat sy eet, moet die sakkie gereeld skoongemaak en vervang word \u2013 ten minste elke tweede tot derde da<\/span>g.<\/p>\n\n\n\n

\n N\u00f3g aanpassings <\/b>\n<\/p>\n\n\n\n

Saam met die chemoterapiesessies moet sy vir 14 dae 3 000 mg chemotablette drink, voordat sy \u2019n rustyd van sewe dae het. Sy het nou reeds twee sessies ondergaan.<\/p>\n\n\n\n

Na vier tot ses chemoterapiesessies elke 21 dae, sal die omkeeroperasie gedoen word. <\/p>\n\n\n\n

Dan is dit weer van vooraf aanpas. Wat die nuwe lewensaanpassing inhou, is nog duister vir haar. <\/p>\n\n\n\n

\u201cVir nou kan ek net gaan op dit wat ek op die internet gelees het: Jy het minimaal beheer oor jou stoelgang en moet altyd naby \u2019n badkamer wees. Maar ek kan myself nie met persone van 50 en ouer vergelyk nie. <\/p>\n\n\n\n

\u201cVolgens my dokter is di\u00e9 operasie die vinnigste gewigsverliesprosedure wat jy kan kry. Jy kan tussen 10 en 20 kg verloor en is nagenoeg 30 keer per dag op die toilet vir die eerste jaar n\u00e1 die operasie. Dit verskil egter van mens tot mens. <\/p>\n\n\n\n

\u201cMy gebed is dat ek nie so baie gewig verloor nie. Ek het al klaar soveel opgeoffer, en weet nie hoeveel ek nog sal moet opoffer en vir hoe lank nie.\u201d <\/p>\n\n\n\n

Tog is daar klein oorwinnings: Helen se liggaam baklei teen vroe\u00eb menopouse \u2013 die eerste goeie nuus na haar besoek aan die dokter in November verlede jaar. <\/p>\n\n\n\n

\n Kankero\u00eb <\/b>\n<\/p>\n\n\n\n

Die fyn, maar sterk vrou pleit: \u201cMoet my nie jammer kry nie. Mense se bejammering gee my kankero\u00eb, al word dit goed bedoel. Motiveer my. Gee my perspektief. Vertel my van die drama in jou lewe. Ek is moeg om oor my eie drama te praat en wil nie konstant daar-deur gekonfronteer word nie.\u201d <\/p>\n\n\n\n

Daar is gelukkig mense, bekend en onbe-kend, wat haar ondersteun. <\/p>\n\n\n\n

\u201cDit is ongelooflik hoe mense inspring en help, onder meer donasies en hulp met die kinders. Wanneer jy konstant naar is, en vier tot ses antinaarheidspille \u2019n dag moet drink, is kosmaak die laaste ding waaraan jy dink.\u201d <\/p>\n\n\n\n

Helen wil graag haar storie met ander deel. <\/p>\n\n\n\n

\u201cEk weet dit is \u2019n ongemaklike onderwerp om oor te praat, maar soveel mense gaan deur dit. \u201cDaar is niemand van my ouderdom met di\u00e9 soort kanker (en wat \u2019n sakkie moet dra), by wie ek vir raad kan aanklop nie. <\/p>\n\n\n\n

\u201cEk sal dus eerder my storie vertel, en indien dieselfde kanker vorentoe by iemand anders gediagnoseer word, kan hy of sy by my hoor hoe ek dit hanteer.\u201d <\/p>\n\n\n\n

Sy wil ook met haar storie groter bewusmaking rondom kolon- en rektale kanker skep. <\/p>\n\n\n\n

Haar filosofie op die moeilike pad: <\/p>\n\n\n\n

\u201cEk lewe vir die klein goedjies en fokus op wat goed is. Doelwitte is belangrik, jy kan nie lewe vir net nou nie.\u201d <\/p>\n\n\n\n