{"id":57779,"date":"2018-07-19T06:01:26","date_gmt":"2018-07-19T04:01:26","guid":{"rendered":"https:\/\/novanews.co.za\/kougaexpress\/n-perd-in-die-huis-en-die-heilige-insig-20180718-2\/"},"modified":"2025-03-20T19:22:37","modified_gmt":"2025-03-20T17:22:37","slug":"n-perd-in-die-huis-en-die-heilige-insig-20180718-2","status":"publish","type":"post","link":"https:\/\/novanews.co.za\/kougaexpress\/n-perd-in-die-huis-en-die-heilige-insig-20180718-2\/","title":{"rendered":"\u2019n Perd in die huis en die heilige insig"},"content":{"rendered":"\n

SEDERT dr. Heilie Uys (66) in Maart 2004 \u2019n nuwe nier ontvang het, het sy as gholfspeler en veldatleet al aan sewe W\u00eareld-Oorplantingspele deelgeneem. <\/p>\n\n\n\n

Met die afgelope nasionale spele in Port Elizabeth was sy fotograaf, want \u2019n skouerbesering het haar uit deelname gehou.<\/p>\n\n\n\n

Uys is ondervoorsitter en sekretaresse van die Oos-Kaapse Ver-eniging van Oorplanting\u00adsport en haar man Willie is die tesourier. <\/p>\n\n\n\n

Haar verhaal is uniek, want vir die langste periode van haar tyd as verpleegspesialis was sy in dialise en oorplantingseenhede.<\/p>\n\n\n\n

\u201cEn jy weet, dan s\u00ea jy altyd vir die pasi\u00ebnt hy of sy moet so voel en . . . en vir my studente het ek altyd ges\u00ea pasi\u00ebnte voel s\u00f3 en toe kry ek nierversaking en \u2019n oorplanting.<\/p>\n\n\n\n

\u201cNou kan ek eerstehands vir hulle s\u00ea d\u00edt is nou hoe die mense voel en ek kan my persoonlike ervaring in die akademie bring \u2013 wat \u2019n ander perspektief daarnatoe bring.\u201d <\/p>\n\n\n\n

Voor haar aftrede en verhuising van Roodepoort na Kaap St. Francis, was Uys voltyds dosent in verpleegkunde aan die destydse Randse Afrikaanse Universiteit in Johannesburg.<\/p>\n\n\n\n

\u201cEk tree nooit af nie, ek verskuif net fokus,\u201ds\u00ea di\u00e9 dinamiese vrou.<\/p>\n\n\n\n

\u201cBenewens my betrokkenheid by oorplantingsport is ek nog deeltyds betrokke by Nelson Mandela-Universiteit asook die Universiteit van die Witwatersrand vir eksaminering en moderering van nefrologie studente (dialise en oorplanting).\u201d<\/p>\n\n\n\n

\n Die \u2018siek modus\u2019 <\/b>\n<\/p>\n\n\n\n

Sy het \u2019n interessante beskouing oor die \u201csiek modus\u201d waarin mense kan verval.<\/p>\n\n\n\n

\u201cAs \u2019n mens vir baie jare siek was, gaan jy in wat ons in Engels noem, \u2019n sick mode.<\/p>\n\n\n\n

\u201cN\u00e1 \u2019n oorplanting bly baie mense in daardie sick mode . . . hulle sit en doen niks met die nuwe gawe wat hulle gekry het. <\/p>\n\n\n\n

\u201cEk s\u00ea altyd dit is soos \u2019n klomp mense wat op \u2019n bus klim. Jy klim op die oorplantingsbus. As jy by die stopstraat kom, dan kan jy kies, of jy klim af van die bus of jy bly op die bus. As jy op die bus bly, dan bly jy in jou sick mode.<\/p>\n\n\n\n

\u201cAs jy afklim van die bus, dan gaan die w\u00eareld vir jou oop, en dan begin jy weer kyk na jou normaliteit. Weet jy, jy kan nie glo nie \u2013 n\u00e1 my nieroorplanting \u2013 binne ses maande het my vel teruggekeer na normaal, my energievlak . . . ek was \u2019n nuwe mens.<\/p>\n\n\n\n

\u201cEk dink \u2019n mens is dit aan die Here verskuldig om iets te doen met die nuwe gawe wat Hy vir jou gegee het. Ek s\u00ea nie jy moet altyd net aan sport deelneem nie, maar jy moet betrokke raak.<\/p>\n\n\n\n

\u201cJy kan byvoorbeeld ook by orgaanoorplantingsbewegings aansluit sodat jy vir ander mense kan vertel wat orgaanoorplantings doen.<\/p>\n\n\n\n

\u201cJy word dan deel van die gemeenskap, jy bly nie in die siek gemeenskap nie.\u201d <\/p>\n\n\n\n

\n Die Perd <\/b>\n<\/p>\n\n\n\n

Maar hoe het sy gevoel toe sy as mediese spesialis nierversaking gekry het?<\/p>\n\n\n\n

\u201cMy verdedigingsmeganisme is intellektualisering . . . dit was amper asof ek ontken het dat ek siek is. Denial. Maar omdat ek so baie geweet het daarvan, was dit vir my baie makliker om te kan hanteer. <\/p>\n\n\n\n

\u201cEk was vir meer as drie jaar op tuisdialise, ek was elke aand gekoppel aan \u2019n masjien. My man en ek het die wonderlikste verhouding met hierdie masjien gehad. <\/p>\n\n\n\n

\u201cSy naam was Die Perd. En as ek nou in die nag so half omdraai en ek l\u00ea op een van die pype en die alarm gaan af, dan stamp hy aan my en hy s\u00ea die perd runnik, wat is verkeerd met die perd. <\/p>\n\n\n\n

\u201cOns het die masjien nie as \u2019n objek, nie as masjien nie, in die huis gebring, Jy moet vir die ding \u2019n naam gee. Hy word n persoonlikheid en dan aanvaar jy hom. <\/p>\n\n\n\n

\u201cOns het Die Perd in ons kar gelaai, op die vliegtuig en ons het met hom saamgegaan tot ek nou my oorplanting gekry het en ek was toe verlos van Die Perd.\u201d<\/p>\n\n\n\n

\n Die heilige les<\/b>\n<\/p>\n\n\n\n

Uys vertel van die heilige les wat sy geleer het. \u201cEk was drie jaar, drie maande en drie dae op dialise . . . en nadat ek my oorplanting gekry het, en ek het gewonder wat beteken al die dries.<\/p>\n\n\n\n

\u201c \u2019n Vriendin het ges\u00ea die antwoord is eenvoudig, ek moet net Jeremia 33:3 lees. Daarin staan toe: Jy het na My geroep en Ek het jou gehoor en Ek sal vir jou dinge wys wat jy nooit geweet het nie . . . <\/p>\n\n\n\n

\u201cEn weet jy, hier was ek as \u2019n akademikus wat alles weet, maar ek het ooit geweet werklik hoe voel so \u2019n pasi\u00ebnt nie . . . en Hy het dit vir my geleer en nou kan ek daardie boodskap uitdra aan andere.\u201d <\/p>\n\n\n\n