{"id":54867,"date":"2019-07-18T06:00:42","date_gmt":"2019-07-18T04:00:42","guid":{"rendered":"https:\/\/novanews.co.za\/kougaexpress\/warm-op-die-kolkatte-se-spoor-20190717-2\/"},"modified":"2025-03-21T10:59:08","modified_gmt":"2025-03-21T08:59:08","slug":"warm-op-die-kolkatte-se-spoor-20190717-2","status":"publish","type":"post","link":"https:\/\/novanews.co.za\/kougaexpress\/warm-op-die-kolkatte-se-spoor-20190717-2\/","title":{"rendered":"Warm op die kolkatte se spoor"},"content":{"rendered":"\n

DIS nie \u2019n plek waar \u2019n mens kan aanklop en sonder meer kan vertrek nie. Lank nadat jy by die huis aangekom het, kuier die beelde van kranse en berge wat jou toevou nog in jou gedagtes en hunker jy weer na wat vir jou so aangrypend was en jou so vasgevang het.<\/p>\n\n\n\n

Die Luiperdroete staan nog in sy kinderskoene, skaars drie jaar oud, maar mense praat reeds in dieselfde asem daarvan as die Otter of die Vis-rivier Canyon.<\/p>\n\n\n\n

Dit is \u2019n ongerepte roete met pragtige uitsigte. Die stiltes is rustig op die gees en die son se spie\u00ebling teen die kenmerkende kranse is onbe-skryflik pragtig.<\/p>\n\n\n\n

Die roete begin (en eindig) by die Cedar Falls-basiskamp in die Baviaanskloof-natuurreservaat, sowat 55 km suidwes van Willowmore. Buiten vir die gerieflike kombuis en twee badkamers, het die basiskamp slaapplek vir 12 mense \u2013 die maksimum getal stappers wat op een slag op die roete toegelaat word. Dit is die laaste bed wat jy vir \u2019n paar dae gaan sien. Daar is \u2019n plan om in die langtermyn hutte op die staproete te bou, maar vir nou moet jy nog jou eie tent saambring om saans in te slaap langs die pad.<\/p>\n\n\n\n

Jy hoef gelukkig nie die tent saam te dra nie, want jou kos en ander pakkaas wat jy nie wil saamdra nie word saam met die tente na elk van die drie oornagplekke aangery. Al wat hy hoef saam te dra, is jou dag se kos en water. Ook elke aand se vleis en drinkgoed word in gemerkte houers in \u2019n vrieskas geb\u00eare en by die kampplek afgelewer.<\/p>\n\n\n\n

\n Dag 1 \u2013 Hallo Gabri\u00ebl<\/b>\n<\/p>\n\n\n\n

Die eerste dag se roete is betreklik maklik, maar \u2019n mens stap jouself behoorlik wakker teen die Kickstart-bult, wat jou asem \u2019n bietjie sal laat jaag tot jy die plato bereik.<\/p>\n\n\n\n

Hiervandaan strek die roete vir \u2019n bietjie meer as 9 km tot by die eerste kampplek. Feitlik die hele roete loop in \u2019n vallei.<\/p>\n\n\n\n

Sowat 5 km van die beginpunt af l\u00ea die graf van Gabri\u00ebl Jakobus Pe-trus van Jaarsveld by \u2019n murasie en draai die roete by \u2019n kloof met styl kranse aan weerskante in. Hier is \u2019n heerlike rusplek by \u2019n paar poele, wat na die einste Gabri\u00ebl genoem is. Hy het glo tot met sy dood in 1926 in hierdie klofie geboer. Hier kan jy afkoel en ook weer jou waterbottel volmaak met vars bergwater. Dit is die enigste water op die eerste skof. Van hier af strek die roete in \u2019n vallei langs tot by die kampplek.<\/p>\n\n\n\n

Daar is nie warmwatersilinders by die kampplek nie, maar die stortwater was verbasend warm, danksy die toevoerpyp wat in die son l\u00ea van waar dit uit die berg kom. Die maksimum dagtemperature wissel van gemiddeld 17 tot 28 \u00b0C deur die loop van die jaar en saans kan dit snerpend koud word. Die eerste dag van ons staptog was redelik warm, maar nie so erg soos die dae wat sou volg nie.<\/p>\n\n\n\n

Elke kamp het \u2019n kombuistent met potte, panne en eetgerei en teen die tyd wanneer jy daar aankom, wag jou bagasie reeds op jou. Hier is ook heelwat vuurmaakhout vir braai en \u2019n geselsvuur.<\/p>\n\n\n\n

\n Dag 2 \u2013 Klim, kyk en swem <\/b>\n<\/p>\n\n\n\n

Die tweede dag begin met \u2019n maklike paadjie langs die Reebokvallei, maar die maklike deel eindig skie-lik by \u2019n afdraai na \u2019n kloof wat lei na die Seder-uitkykpunt. Dit is sowat 400 m se klouter en klim oor groot rotse tot waar \u2019n klompie sederbome \u2019n onlangse brand hoog bokant die kloof-bodem vrygespring het. Hier kan jy \u2019n wyle vertoef om jou asem terug te kry.<\/p>\n\n\n\n

Terug op die hoofroete begin \u2019n paar steiltes wat \u2019n mens behoorlik moeg maak tot by die bo-punt vanwaar jy die pragtige uitsig oor die Baviaanskloof-berge kan inneem.<\/p>\n\n\n\n

N\u00e1 nog \u2019n erge steil afdraand is daar kans om \u2019n rukkie te vertoef by die Reflection Pools waar jy weer waterbottels kan volmaak en selfs \u2019n bietjie swem. Hierna volg \u2019n paar steiltes wat jou daaraan herinner dat jy in die ongerepte Baviaanskloof is. Sommige dele van die tweede dag se roete is redelik moeilik en wanneer \u2019n mens Labyrinth Hill bereik voel jou bene amper te moeg om die laaste twee bulte uit te klim tot by die tweede kamp.<\/p>\n\n\n\n

Die kamp is teen die berghang en die kombuistent is effens verwyder van die afgebakende tentstaanplekke. Di\u00e9 stort het net koue water.<\/p>\n\n\n\n

\n Dag 3 \u2013 Bult op en bult af <\/b>\n<\/p>\n\n\n\n

Die derde dag is die langste en ook die moeilikste skof van die hele roete. Jy hoef nie \u2019n Comrades-atleet te wees nie, maar jy het darem \u2019n mate van fiksheid nodig. As jy moeg raak wanneer jy oor die lengte van die inkopiesentrum se parkeerterrein moet stap, gaan jy beslis hier swaarkry. Die helfte van die roete bestaan uit drie bulte wat jy moet uitklim en dan weer af aan die ander kant \u2013 Honeybush Hill, Inconvenient Truth en Ain\u2019t So Bad. Elke steilte voel soos \u2019n ewigheid en aan die bopunte moet \u2019n mens eers asem skep voor jy weer die afdraand aan die ander kant versigtig aanpak.<\/p>\n\n\n\n

Maak maar seker jy dra genoeg water saam, want daar is geen plek om water aan te vul op die eerste helfte van die dag se roete nie.<\/p>\n\n\n\n

Wanneer \u2019n mens eindelik die bopunt van die Ain\u2019t So Bad-saaltjie bereik het, begin die roete weer stadig afsak na Turning Point en lei die tweede deel van die roete jou na die pragtige 9 km-lange Kasey-kloof met foto-mooi kranse aan weerskante.<\/p>\n\n\n\n

Hier stap \u2019n mens al langs die rivier en dis \u2019n goeie plek vir \u2019n blaaskans en om in die rivier se koue water te swem. \u2019n Brand het onlangs \u2019n groot deel van die kloof verwoes en terwyl die plantegroei nog herstel, is die koelte skraps. \u2019n Mens stap van die een skadukol na die volgende een.<\/p>\n\n\n\n

Die tog in die kloof is redelik maklik, maar die eerste deel van die dag eis sy tol op jou bene en dit is met dankbaarheid dat \u2019n mens die derde kamp bereik. Die totale afstand van die derde dag is ongeveer 20 km en beproef stappers se vermo\u00eb.<\/p>\n\n\n\n

Di\u00e9 kamp is net so gerieflik soos die ander, ook met \u2019n toegeruste kombuistent met opwasgeriewe met lopende water. Die tentstaanplekke is ver van mekaar af, netjies gelyk en afgebaken met klippe.<\/p>\n\n\n\n

Die looppaadjies word ook afgemerk en daar is moeite gedoen om die natuur te bewaar.<\/p>\n\n\n\n

Alle vuilgoed en afval word weer saamgeneem wanneer die bagasie en toerusting die volgende dag opgelaai word.<\/p>\n\n\n\n

\n Dag 4 \u2013 Nie vir sissies nie<\/b>\n<\/p>\n\n\n\n

Die laaste 12 km-lange skof begin met 4 km se gemaklike stap tussen die kranse in die Birdsong-vallei.<\/p>\n\n\n\n

By die Fond Farewell-punt kom di\u00e9 gemak egter tot \u2019n wrede einde en wag daar \u2019n hewige steilte op \u2019n mens.<\/p>\n\n\n\n

Hierdie rotsagtige steilte is vir sommige stappers die moeilikste deel van die roete, maar \u2019n mens kan halfpad rus, van waar jy tot ver onder in die kloof kan sien.<\/p>\n\n\n\n

Dan klim jy maar weer tot bo-op die berg en stap op die kruin langs tot jy begin daal tot in die Cauldron, \u2019n reeks van twee klein valleie.<\/p>\n\n\n\n

Hierna volg \u2019n erg klipperige spoor teen die steiltes af na die vallei wat jou teruglei na die Cedar Falls-basiskamp.<\/p>\n\n\n\n

Hoewel die laaste dag heelwat korter is as die derde dag, is dit nie veel makliker nie. Dit laat darem genoeg tyd om te ontspan voor die vuur vir die aand aangesteek word.<\/p>\n\n\n\n

\n Dag 5 \u2013 Waterval toe <\/b>\n<\/p>\n\n\n\n

Van die basiskamp is daar \u2019n dagstap-roete deur die kloof aan die westekant van die kamp, na die na-bygele\u00eb Ceder Falls-waterval.<\/p>\n\n\n\n

Jy kan di\u00e9 roete op sy eie aanpak \u00f3f as \u2019n vyfde dag van die Luiperd-roete.<\/p>\n\n\n\n

Hier was duidelik onlangs \u2019n groot vloed en sommige van die aanwysingsbordjies is weg. Die gevolg is dat \u2019n mens maklik die verkeerde koers kan inslaan, maar as jy eers die regte roete gekry het en by die watervalpunt uitkom, word jy beloon met \u2019n heerlike swemplek.<\/p>\n\n\n\n