{"id":48786,"date":"2022-06-17T11:44:50","date_gmt":"2022-06-17T09:44:50","guid":{"rendered":"https:\/\/novanews.co.za\/kougaexpress\/diefstal-van-wild-op-plase-deesdae-n-groot-probleem-20220615-2\/"},"modified":"2025-03-13T16:48:47","modified_gmt":"2025-03-13T14:48:47","slug":"diefstal-van-wild-op-plase-deesdae-n-groot-probleem-20220615-2","status":"publish","type":"post","link":"https:\/\/novanews.co.za\/kougaexpress\/diefstal-van-wild-op-plase-deesdae-n-groot-probleem-20220615-2\/","title":{"rendered":"Diefstal van wild op plase deesdae \u2019n groot probleem"},"content":{"rendered":"

Om wilde diere op reservate of wildplase op te pas kan traumaties en gevaarlik wees, s\u00ea Nico Mostert.<\/p>\n

Mostert is \u2019n spesialis wat by die sekuriteit en beveiliging van verskeie plase en reservate in die Hankey- en Loerie-gebiede in die Oos-Kaap werksaam is.<\/p>\n

\u201cAlmal weet van die stropery van renosters se horings, maar dis net die punt van die ysberg,\u201d s\u00ea Mostert wat self vir \u2019n paar jaar in Limpopo renosterhoring-stropers aan die pen laat ry het.<\/p>\n

\u201cHier in die Kouga-distrik is daar ook die gevaar van jagtery met honde.\u201d<\/p>\n

\u201cDis nou waar die diewe met enig-iets van vier tot sewe honde op \u2019n plaas inkom, gewoonlik word die grensdrade geknip of gate word onderdeur die draad gegrawe, en die honde word dan gebruik om die prooi te jag en te vang.<\/p>\n

\u201cHonde byt \u2019n swartwitpens-ram stukkend. \u2019n Kameelperd raak so verbouereerd deur die honde dat hy deur \u2019n heining hardloop. Kilometers v\u00ear. Nou moet die eienaar ten duurste \u2019n helikopter huur om die kameelperd weer op te spoor, daar is geweldige onkoste en trauma vir die diere aan so iets verbonde.\u201d<\/p>\n

Smit s\u00ea die hondejagtery styg in die Oos-Kaap omdat daar vir die diewe \u2019n mark is.<\/p>\n

N\u00e1 die diewe die verskeurde dier keelaf gesny en weggesleep het, verkoop hulle die vleis by sogenaamde \u201ckleiner\u201d winkels in armer woongebiede.<\/p>\n

\u201cSelfs beeste word op di\u00e9 manier gejag, gesteel en verkoop,\u201d s\u00ea Mostert.<\/p>\n

Hy gebruik deesdae operateurs wat hy self opgelei het om teen die plase of reservate se heinings, gewoonlik te voet, te patrolleer.<\/p>\n

\u201cHulle loop veral daar waar ons weet die diewe gereeld probeer inkom. So \u2019n operateur moet ook strikke verwyder as deel van sy werk, want jy kry ook die diewe wat net vir die pot jag,\u201d vertel Mostert. \u201cDie diewe wat die strikke gebruik, probeer kleiner wild, soos duikers, of hase of vo\u00ebls soos tarentale en patryse vang.\u201d<\/p>\n

Volgens Mostert is dit belangrik om \u201csigbaar\u201d te wees om die diewe af te skrik. <\/p>\n

\u201cOns l\u00ea soms vir hulle hinderlae. Dis beslis nie kinderspeletjies nie,\u201d vertel hy.<\/p>\n

Daar is ook die meer gespesialiseerde wilddiewe. Dis daardie diewe wat \u2019n bok wat naby \u2019n pad loop met \u2019n geweer waarop \u2019n knaldemper is, sal skiet en onderdeur die draad na sy bakkie sleep.<\/p>\n

\u201cDis gevaarlike werk hierdie en daarom werk ek baie nou saam met die polisie,\u201d s\u00ea hy.<\/p>\n

\u201cDie skelms steel ook baie boere se groente of vrugte, dis veral maklik as die bome reg langs die pad staan. Dis vir my of daar veral in die laaste jaar of wat al meer en meer diefstal plaasvind.\u201d<\/p>\n

Volgens hom is werkloosheid en armoede een van die groot redes waarom mense wild probeer steel.<\/p>\n

\u201cDie boere in hierdie gebied is groot werkverskaffers, maar daar is nog steeds te min werk. Ek weet nie wat nie, maar hier sal beslis iets gedoen moet word om meer werk te skep,\u201d waarsku hy.<\/p>\n

Maar al gaan dit hoe swaar, skelmstreke sal gewis nie deur Mostert en sy gedugte span geduld word nie!<\/p>\n