{"id":48426,"date":"2021-03-16T16:52:09","date_gmt":"2021-03-16T14:52:09","guid":{"rendered":"https:\/\/novanews.co.za\/komani-karoo\/agri-ok-raak-betrokke-by-riool-stryd-20190911\/"},"modified":"2025-03-19T17:22:54","modified_gmt":"2025-03-19T15:22:54","slug":"agri-ok-raak-betrokke-by-riool-stryd-20190911","status":"publish","type":"post","link":"https:\/\/novanews.co.za\/komani-karoo\/agri-ok-raak-betrokke-by-riool-stryd-20190911\/","title":{"rendered":"Agri OK raak betrokke by \u2018riool-stryd\u2019"},"content":{"rendered":"\n

Onbehandelde riool loop volgens Retief Odendaal, DA-lid van die Oos-Kaapse wetgewer en leier van die Oos- Kaapse Middellande, nog steeds uit die Inxuba Yethemba-munisipaliteit (IYM) se disfunksionele watersuiweringsisteem in die Groot Visrivier wat \u2019n lewensaar vir landbou \u00e9n talle neder- settings langs die rivier is.<\/p>\n\n\n\n

D\u00edt ondanks die bevestiging wat meer as \u2019n maand gelede deur die Chris Hani-distriks-munisipaliteit (wat die suiweringswerke namens IYM bestuur) gegee is dat herstelwerk aan di\u00e9 suiweringswerke by Cradock begin het.<\/p>\n\n\n\n

Agri Oos-Kaap gaan nou ondersoek instel of die staat al enige regstappe gedoen het om die munisipaliteit te dwing om sy werk te doen.<\/p>\n\n\n\n

Die Menseregtekommissie het intussen ook bekendgemaak dat hulle ondersoek gaan instel of die grondwetlike reg van toegang tot skoon drinkwater geskend word.<\/p>\n\n\n\n

In Junie vanjaar het die department van water en sanitasie, by monde van Andrew Lucas, \u2019n verteenwoordiger van die departement verantwoordelik vir waterregulering in die Oos-Kaap, in \u2019n nuusverklaring bevestig dat hulle die munisipaliteit oor die disfunksionele watersuiweringswerke hof toe gaan sleep.<\/p>\n\n\n\n

Geen bewyse van regstappe<\/strong> <\/strong><\/p>\n\n\n\n

Sekere regsdokumente moes luidens di\u00e9 verklaring net in plek gestel word en sou al op 28 Junie vanjaar by die department se regsafdeling gewees het.<\/p>\n\n\n\n

Maar sover kon hulle nog geen bewyse van enige sulke regstappe vind nie, s\u00ea Douglas Stern, president van Agri Oos-Kaap.<\/p>\n\n\n\n

\u201cONS sien niks gebeur nie. Ons verstaan daar is nog geen regstappe teen die munisipaliteit gedoen nie,\u201d s\u00ea Douglas Stern.<\/p>\n\n\n\n

\u201cOns gaan di\u00e9 bewerings ondersoek en indien dit blyk dat daar inderdaad geen aksie geneem is nie, sal Agri Oos-Kaap die saak verder neem. Want oor die langtermyn kan di\u00e9 besoedeling \u2018n massiewe impak op landbou h\u00ea.\u201d<\/p>\n\n\n\n

Ekologiese \u00e9n ekonomiese ramp<\/strong><\/p>\n\n\n\n

Odendaal s\u00ea hy vrees \u2019n ekologiese \u00e9n ekonomiese ramp indien onbehandelde riool in die Visrivier bly loop.<\/p>\n\n\n\n

Hy het \u2019n klagte by die Mense- regtekommissie ingedien en op 26 Augustus het Abongile Sipondo, provinsiale bestuurder van die Menseregtekommissie in die Oos- Kaap, bevestig dat die kommissie ondersoek gaan instel.<\/p>\n\n\n\n

\u201cToegang tot skoon drinkwater is \u2019n basiese mensereg. Daar is nedersettings langs die Visrivier. In hierdie droogte bied di\u00e9 rivier hulle hul enigste drinkwater. Hulle het g\u00e9\u00e9n ander keuse as om dit te gebruik nie,\u201d s\u00ea Odendaal.<\/p>\n\n\n\n

Hy het ook \u2019n kriminele klagte in terme van die Nasionale Waterwet (1998) teen Dr Bhekisisa Mthembu, waarnemende munisipale bestuurder van die Chris Hani-distriks- munisipaliteit, by die polisie aanhangig gemaak.<\/p>\n\n\n\n

\u201cD\u00edt oor die volgehoue besoedeling van die Groot Visrivier. Indien di\u00e9 wat in die aanklagte ge\u00efmpliseer is, skuldig bevind word, kan hulle \u00f3f tien jaar tronkstraf, \u00f3f \u2019n stewige boete, \u00f3f albei opgel\u00ea word.\u201d<\/p>\n\n\n\n

\u201cDis krimineel dat die water- suiweringswerke nie 100% funksio-neer nie, want indien landbou in die toekoms weens besmette produk as gevolg van besmette water ineenstort, val die hele ekonomiese kaartehuis inmekaar. Ons praat van honderde boere, indien nie duisende nie, wat di\u00e9 water gebruik en werkgeleent-hede aan duisendes skep. Landbou speel ook \u2019n sleutelrol in Karoo-dorpe, onder meer Cradock, se ekonomie.\u201d<\/p>\n\n\n\n

Odendaal het ook die OK-Groen Skerpioene gevra om die rou rioolstortings vanuit die Cradock watersuiwerinsgwerk in die Groot Visri- vier te ondersoek. Inspekteurs van di\u00e9 omgewingsbestuur-inspektoraat het ondersoek gaan instel en bevind dat die klagte substansie het.<\/p>\n\n\n\n

\u201cOns department het saam met die Chris Hani-distriksmunisipaliteit en die department water en sanitasie na oplossings begin soek en op 28 Junie 2019 bevestiging ontvang dat \u2019n kontrakteur aangestel is om herstelwerk aan die Cradock watersuiwerings-werke te doen,\u201d lui die Groen Sker-pioene (OK) se verklaring.<\/p>\n\n\n\n

\u201cAanvanklik het dit geblyk dat herstelwerk gedoen is, maar toe word daar w\u00e9\u00e9r berig dat onbehandelde riool in die Groot Visrivier beland. Amptenare monitor nou die situasie en het die onderneming gegee om in te gryp indien die huidige herstel- pogings gestaak word en die situasie versleg,\u201d aldus die verklaring.<\/p>\n\n\n\n

Maar vir Odendaal bly dit by sien is glo. \u201cBitter min werk is gedoen en die suiweringswerke is steeds nie funksioneel nie.\u201d<\/p>\n\n\n\n