Twaalf mense, onder wie politici, akteurs, plaaslike inwoners en sake-eienaars, het boodskappe gestuur aan die inwoners van Gerimed-ouetehuis en Kogelpark-aftreeoord in Kleinmond, wat al die afgelope vier en \u2019n half maande in algehele inperking is. Trisa Hugo is die meesterbrein wat talle mense se bydraes met bemoedigende boodskappe in \u2019n emosionele video vir die inwoners van Gerimed en Kogelpark kombineer het. Volgens Alet Lloyd, bestuurder by Gerimed-ouetehuis, het die situasie by die tehuis \u2019n paar weke terug vererger toe vier van Gerimed se inwoners Covid-19 opgedoen het en al die inwoners tot hul kamers ingeperk moes word. \u201cToe die strandmeer op 17 Julie in Kleinmond deurbreek, was my hart dadelik seer toe ek dink aan Pieta Pieterse en Isabella Wagenaar, twee ywerige fotograwe wat albei in Gerimed tydens di\u00e9 spesiale gebeurtenis ingeperk moes bly,\u201d vertel Hugo. <\/p>\n\n\n\n
\u201cEk het toe besluit om \u2019n video te maak en het \u2019n klomp mense gevra om boodskappe te stuur om die bejaardes te motiveer en om vir hulle te wys hoe mooi lyk Kleinmond tans en wat hul alles misgeloop het,\u201d s\u00ea Hugo.Die video van 15 minute begin met \u2019n boodskap van \u2019n plaaslike dokter in Kleinmond, dr. Lieze Morkel, waar sy goeie wense aan al die bejaardes stuur. Pierre van Pletzen en Sandra Vaughn, die bekende akteurpaar van Kleinmond, het ook \u2019n mooi boodskap vir die bejaardes gelaat. \u201cOnthou, julle is my narsings van die saron, my lelie van die dale; dit is voorwaar vir my \u2019n riem reg onder die blaas om aan julle hulde te bring,\u201d s\u00ea Pierre, wat bekend is vir sy rol as Oubaas in 7de Laan. Anton Goosen, die bekende Afrikaanse musikant van Gansbaai, het ook sy wense aan die inwoners van Gerimed en Kogelpark oorgedra. \u201cWat maak vir Kleinmond lekker? Die seaview maak vir Kleinmond lekker,\u201d het Goosen gesing terwyl hy sy kitaar vlugtig getokkel het. Grant Cohen, die wyk\u20099-raadslid, het ges\u00ea hy dink aan die bejaardes. \u201cOns mis julle in die dorp. Julle is nie alleen in di\u00e9 tydperk nie. Bly sterk, bly veilig en bly warm,\u201d het hy ges\u00ea. <\/p>\n\n\n\n
Celeste Krouse, \u2019n plaaslike inwoner van Kleinmond, het die bejaardes in haar huis vir \u2019n \u201cvirtuele koppie koffie\u201d genooi. Sy het voor haar huis gewys na \u2019n geverfde stoel met die boodskap: \u201cAnd now these three remain: Faith, Hope and Love. But the greatest is love.\u201d Dudley Coetzee, die Overstrand-munisipaliteit se uitvoerende burgemeester, het die bejaardes in Gerimed \u2019n spoedige herstel toegewens en inwoners herinner om hul maskers te dra en gereeld hul hande te was. Die 16-jarige Cassidy Adams van Kleinmond het \u2019n kort liedjie vir die bejaardes gesing voordat Alan Winde, die Wes-Kaapse premier, sy boodskap aan die bejaardes oorgedra het: \u201cEk wil h\u00ea julle moet gou gesond word. Vir die paar wat Covid-19 positief getoets is, druk deur. Ek weet dis nie lekker nie want ek was self ook positief. Word gou gesond,\u201d het Winde laat hoor. Mia Solomons het Psalm 91 namens Kleinmond se jeug vir die bejaardes voorgelees. Masizole Mnqasela, speaker van die Wes-Kaapse parlement, het sy wense aan die bejaardes oorgedra en ges\u00ea hulle moet na hulself omsien. \u201cEk weet julle sukkel met die lang tye van inperking en julle is in afsondering in jul kamers, maar druk deur,\u201d lui Mnqasela se boodskap. <\/p>\n\n\n\n
Johan Olivier van die Blou Bakkie s\u00ea hy was bevoorreg om langs die see te kon stap en die strandmeer te sien deurbreek.\u201cEk weet julle sou wat wou gee om dit self ook te kon ervaar. Wel, die winter het goeie re\u00ebn gebring; die landerye is grasgroen en ons boere juig. Die seisoen is ook klaar besig om te verander. Op pad Caledon toe pronk die eerste songeel kanola\u2019s al,\u201d het Olivier in die video ges\u00ea. Hy het bygevoeg die Blou Bakkie mis die bejaardes en sien daarna uit om hulle gou weer te ontvang. Tussen elke twee boodskappe kan \u2019n mens \u2019n mooi natuurtoneel sien en by die Blou Bakkie se video sien \u2019n mens \u2019n klomp klante se vriendelike gesigte. \u201cEk wil almal vir hul bydraes en videos bedank. Ek moet raadslid Grant ook bedank, wat self al die video\u2019s van die politici gekry het,\u201d s\u00ea Hugo. Lloyd het namens hulself en Kogelpark Trisa en almal se kort video-insetsels bedank. Die vier inwoners van Gerimed-ouetehuis het onlangs almal heeltemal herstel en die meeste van hulle het min simptome getoon terwyl net sekeres lugweginfeksies opgedoen het. \u201cDie video het my skoon \u2019n knop in die keel gegee. Dit is so mooi en ek wil al die prominente mense in die video vir hul mooi boodskappe aan ons bejaardes bedank. Ek gaan die video vanmiddag (Donderdag) in etenstyd vir die bejaardes wys,\u201d s\u00ea Lloyd.<\/p>\n\n\n\n