{"id":46555,"date":"2024-02-23T08:16:56","date_gmt":"2024-02-23T06:16:56","guid":{"rendered":"https:\/\/novanews.co.za\/eikestadnuus\/n-fees-in-pniel-om-nie-mis-te-loop-nie-20240222-2\/"},"modified":"2025-03-20T06:44:43","modified_gmt":"2025-03-20T04:44:43","slug":"n-fees-in-pniel-om-nie-mis-te-loop-nie-20240222-2","status":"publish","type":"post","link":"https:\/\/novanews.co.za\/eikestadnuus\/n-fees-in-pniel-om-nie-mis-te-loop-nie-20240222-2\/","title":{"rendered":"\u2019n Fees in Pni\u00ebl om nie mis te loop nie"},"content":{"rendered":"\n

Feeskoors loop hoog in die Dwarsriviervallei met die jaarlikse Adam Small-boekefees wat die komende naweek in Pni\u00ebl gehou word.<\/p>\n\n\n\n

Die sewende weergawe van die boek- en liter\u00eare-fees, wat na die alombekende ontslape digter, dramaturg, akademikus, filosoof, rubriekskrywer, maatskaplike werker, aktivis en een van die stigters van die Universiteit van die Wes-Kaapland vernoem is, word van Donderdag 22 tot Sondag 25 Februarie aangebied.<\/p>\n\n\n\n

Die vierdag-geleentheid word deur die Pni\u00ebl Erfenis- en Kultuurtrust (PEKT) in samewerking met die ATKV aangebied, met praatjies, werksessies, musiek, lesings en gesprekke wat hoofsaaklik in die tuin van die Pni\u00ebl-museum en die Pni\u00ebl Congregational-kerk gehou word. <\/p>\n\n\n\n

Volgens die hooforganiseerder en PEKT-voorsitter, Janine Myburgh, skakel die fees in by die visie van die trust, om die dorp en sy mense se kultuur-historiese geskiedenis te beskerm. \u201cDie doel was aanvanklik slegs om hulde te bring aan prof. Adam Small. Breyten Breytenbach het ges\u00ea dat hy lank reeds die Hertzog-prys moes kry, maar erkenning is eers in 2012 aan Small gegee, toe hy hierdie gesogte prys ontvang het,\u201d verduidelik sy.<\/p>\n\n\n\n

\u201cDie Adam Small-fees in Pni\u00ebl het hulle dus voorgespring deur erkenning te gee aan een van ons eie, wat braaf genoeg was om in Afri-Kaaps te skryf en politieke gevegte aan te gaan vir sy mense.\u201d <\/p>\n\n\n\n

En met die feestema K\u00f4 hys toe, \u2019n verwerking van Small se gewilde boek, Kanna hy k\u00f4 hystoe<\/em>, hoop die organiseerders om veral die inwoners van dorpe in die Dwarsriviervallei na die geleentheid te lok. \u201cDit is hartseer dat die inwoners van Pni\u00ebl en die vallei n\u00e1 sewe jaar nog nie besef watter waardevolle liter\u00eare en kulturele pakket gratis hier op hul voorstoep aangebied word nie,\u201d s\u00ea Myburgh.<\/p>\n\n\n\n

\u201cDie fees is \u2019n onbeskryflike waardevolle geleentheid, eie aan Pni\u00ebl. Vir soortgelyke feeste in ons buurdorpe moet feesgangers \u2019n jaar of twee voor die tyd begroot. Ons werk daaraan om mense na die fees te lok deur nuwe projekte soos die volwasse- en skole-skryfprojekte te skep, asook verskeie ander aanbiedings en werksessies by die fees voor te stel.\u201d<\/p>\n\n\n\n

Tog het die organiseerders sedert die ontstaan van die fees in 2017 positiewe terugvoering van plaaslike inwoners ontvang. Een boodskap lui: \u201cAs kind van die vallei is dit een van die hoogtepunte op my persoonlike kalender. Wat \u2019n verrykende ervaring. Ek geniet die skrywers vreeslik en word ge\u00efnspireer om meer te lees.\u201d<\/p>\n\n\n\n

Die Adam Small-boekefees bied \u2019n platform vir Afri-Kaapse skrywers wat, soos Small, nooit erkenning gekry het vir hul liter\u00eare werke nie.<\/p>\n\n\n\n

\u201cMaar Darryl David, die fees se stigter, programleier en sameroeper van die skrywers, glo dit sal altyd \u2019n veelrassige fees wees, en almal is welkom om die fees by te woon,\u201d s\u00ea Myburgh. \u201cOns poog om nooit \u2019n toegangsfooi na die voorlesings te vra nie, en danksy ons vennootskap met die ATKV, kan ons nou fokus om die Adam Small-fees en die programme vir Afrikaans, wat die ATKV aanbied, na die gewone mens bring.<\/p>\n\n\n\n

\u201cOns het ook ander borge wat ons jaarliks ondersteun en bydra tot die sukses van die fees jaar na jaar \u2013 ons het groot dankbaarheid aan hulle wat \u2019n liefde vir Afrikaans en die literatuur het.\u201d<\/p>\n\n\n\n

Van die fees se hoogtepunte deur die jare sluit sprekers en kunstenaars soos dr. Rosalie Small (weduwee), Albie Sachs, Breytenbach, prof. Michael le Cordeur, Helen Zille, Diana Ferrus, Jacques Pauw, Pni\u00ebl-boorling Adrian Lackay, Tracy Going, Chase Rhys, Julian Jansen, dr. Marlene le Roux, Lyntjie Jaars, Natalia da Rocha, Crystal-Donna Roberts, dr. Beryl Bothma en baie meer in. <\/p>\n\n\n\n

Vanjaar is daar weer \u2019n verskeidenheid vermaak, lesings, werksessies, en aktiwiteite waarna feesgangers kan uitsien. Dit sluit in die VVA-leeskonferensie (22 Februarie); VVA-skoleprogram met Anzil Kulsen (23 Februarie); VVA Ommietafelgesprek met Ferrus, Kulsen, Andr\u00e9 Hendricks en gesprekleier Chareldine van die Merwe (23 Februarie); die fees se gedenklesing deur prof. Hein Willemse (24 Februarie); die ATKV-Suidoosterfees Koorwerksessies (24 Februarie); die Adam Small Klawerjas-vertoning (24 Februarie); en lesings deur dr. Harlan Cloete en Pieter du Toit, skrywer van T<\/em>he Stellenbosch Mafia<\/em> en The ANC Billionaires<\/em>.<\/p>\n\n\n\n