{"id":44476,"date":"2024-07-11T06:06:23","date_gmt":"2024-07-11T04:06:23","guid":{"rendered":"https:\/\/novanews.co.za\/eikestadnuus\/diepduik-in-ras-klas-en-identiteit-20240710-2\/"},"modified":"2025-03-20T07:18:34","modified_gmt":"2025-03-20T05:18:34","slug":"diepduik-in-ras-klas-en-identiteit-20240710-2","status":"publish","type":"post","link":"https:\/\/novanews.co.za\/eikestadnuus\/diepduik-in-ras-klas-en-identiteit-20240710-2\/","title":{"rendered":"Diepduik in ras, klas en identiteit"},"content":{"rendered":"\n

In sy laaste laerskooljare het Danie Marais se bibliotekaresse-ma hom voorgestel aan die Junior Verseboek<\/i> wat deur D.J. Opperman saamgestel is. D\u00edt was sy eerste ontmoeting met po\u00ebsie.<\/p>\n\n\n\n

Nou, dekades later, vier di\u00e9 Stellenbosse digter die bekendstelling van sy derde digbundel, Ek en jy bestaan nie<\/i>. Dis sy vierde boek en volg op die hakke van die digbundels In die buitenste ruimte <\/i>(2006), Al is die maan \u2019n misverstand<\/i> (2009) en Solank verlange die sweep swaai<\/i> (2014), en sy rubriek- en essay-bundel van 2015, Pruimtwak en skaduboksers<\/i>.<\/p>\n\n\n\n

Die Eikestad, sy mense en sy samelewing is sentraal tot die idee agter Ek en jy bestaan nie<\/i>. Hy het in 2015 gedurende die #FeesMustFall-opstande \u2013 \u2019n tyd van \u201cpolitieke ongeduld en wrewel\u201d \u2013 aan die bundel begin werk en het dit vroeg vanjaar voltooi. <\/p>\n\n\n\n

\u201cDit was \u2019n langer proses, maar het ontstaan uit die ongemakke van ras en klas in \u2019n geweldig ongelyke Stellenbosch,\u201d verduidelik Marais. \u201cEk wou probeer sin maak van my eie posisie en bevoorregting as pa en middeljarige middelklas-witman in hierdie verskeurde samelewing. Ek wou die moeilikste vrae rakende bevoorregting in gedigte verken op soek na groter begrip en eerlike antwoorde.<\/p>\n\n\n\n

\u201cDie ongemakke van ras en klas is gebed binne die raamwerk van \u2019n meer universele bestaansangs wat met middeljarigheid gepaard gaan. \u2019n Mens wonder hoe jy hier beland het.\u201d<\/p>\n\n\n\n

Marais is in Kimberley gebore en het vir die eerste sewe jaar van sy lewe in die Noord-Kaapse dorp as deel van \u2019n liefdevolle middelklas-gesin grootgeword. Die Marais-familie het na Pretoria verhuis, waar Marais sy skoolloopbaan van gr.2 tot matriek aan die Ho\u00ebrskool Menlopark voltooi het. <\/p>\n\n\n\n

Sy pa, Callie, was \u2019n ingenieur en sy ma, Cecile, \u2019n Afrikaans-onderwyser voordat sy as bibliotekaresse by Unisa begin werk het. \u201cDeur haar was ek van kleins af lief vir stories en boeke. Sy het my iewers in die laaste jare van laerskool die Junior Verseboek<\/i> gegee, en dit was my gateway drug<\/i> na po\u00ebsie.\u201d <\/p>\n\n\n\n

Marais se oupa, ds. Dirk Jordaan, was destyds leraar van die NG Sendingkerk in Distrik Ses en het die gedwonge verskuiwings van die 1960\u2019s beleef. \u201cDit het \u2019n groot indruk op my ma gemaak. Sy het in die apartheidsjare saam met bruin kinders kerk toe gegaan, en dit het haar \u2019n ander perspektief gegee. Ek het dus grootgeword in \u2019n huis waar apartheid altyd as verkeerd en onregverdig gesien is.\u201d<\/p>\n\n\n\n

N\u00e1 skool het hy B.Comm Regte aan die Universiteit Stellenbosch studeer, waar hy in sy derde jaar verlief geraak het op \u2019n Duitse uitruilstudent. Nadat hy graad gevang het is hy agter di\u00e9 liefde aan Duitsland toe. \u201cIn Duitsland het ek aan die Carl von Ossietzky-universiteit in Oldenburg in die onderwys studeer met Duits, wiskunde en filosofie as hoofvakke. Ek het daar ook as onderwyser gekwalifiseer,\u201d vertel Marais.<\/p>\n\n\n\n

Dit was sy verlange na sy geboorteland wat hom in 1996 tot pen en papier gedryf het. Hy het toe besef hy het nie \u2019n benul van die grootmenslewe nie, en sy verhouding met sy Duitse liefde het ook begin wankel. <\/p>\n\n\n\n

Behalwe vir die po\u00ebsie wat hy skryf, is di\u00e9 pa van twee ook \u2019n kranige joernalis wat graag musiek- en boekresensies, rubrieke, essays en profiele skryf. As skrywer beskryf hy homself as \u201cmelancholies, ironies en nuuskierig\u201d.<\/p>\n\n\n\n

Die titel vir sy nuutste werk het uit \u2019n gesprek met \u2019n kollega in 1999 gekom. \u201c \u2019n Bruin werksvriend het een aand by \u2019n lekker kuier ges\u00ea: \u2018Ou Danie, jy weet mos \u2013 swart, wit en bruin kan mekaar nie vat nie. Ek en ou Danie, ek en jy bestaan nie.\u2019 \u201d<\/p>\n\n\n\n

Marais moedig mense aan om die digbundel te lees om \u2019n gevoel van eensaamheid te kelder. <\/p>\n\n\n\n

Die talentvolle skrywer werk tans saam met Erns Grundling en Bonanza Films aan \u2019n dokument\u00ear oor die geskiedenis van Afrikaans. <\/p>\n\n\n\n

Marais is di\u00e9 Saterdag (13 Julie) by die Stellenbosch-biblioteek in Pleinstraat in gesprek met Bibi Slippers oor Ek en jy bestaan nie<\/span>. Die bekendstelling begin om 11:00. Bespreek jou plek deur Nizamudien Bray te kontak by 021 808 8397 of Nizamudien.Bray@stellenbosch.gov.za.<\/span><\/p>\n\n\n\n