{"id":43452,"date":"2024-09-27T10:03:43","date_gmt":"2024-09-27T08:03:43","guid":{"rendered":"https:\/\/novanews.co.za\/eikestadnuus\/oorplantings-red-lewens-20240925-2\/"},"modified":"2025-03-20T07:31:38","modified_gmt":"2025-03-20T05:31:38","slug":"oorplantings-red-lewens-20240925-2","status":"publish","type":"post","link":"https:\/\/novanews.co.za\/eikestadnuus\/oorplantings-red-lewens-20240925-2\/","title":{"rendered":"Oorplantings red lewens, s\u00ea jong Stellenbosser"},"content":{"rendered":"\n

Fit for life<\/span> en om die lewe tot die uiterste te leef \u2013 dit is Herculaas Lamprecht se leuse vir sy lewe en ook toevallig die leuse van vanjaar se Suid-Afrikaanse Nasionale Oorplantingspele.<\/p>\n\n\n\n

Hoewel hy sy Achilles-tendon beseer het, is Herculaas (27) steeds opgewonde dat vanjaar se Spele in Kaapstad plaasvind.<\/p>\n\n\n\n

Herculaas, \u2019n voormalige leerder van Paul Roos Gimnasium, se lewe het op 13-jarige ouderdom onomkeerbaar verander nadat akute myelo\u00efede leukemie (AML) by hom gediagnoseer is.<\/p>\n\n\n\n

\u201cEk het op 23 Maart 2011 \u2019n beenmurg-oorplanting by die Mediclinic Constantiaberg ontvang en dit het my lewe gered. N\u00e1 die oorplanting en met intensiewe chemoterapie het die Here \u2019n wonderwerk in my lewe gebring. Die oorplanting het my lewe gered,\u201d s\u00ea hy.<\/p>\n\n\n\n

Hoewel dit \u2019n moeilike tyd vir Herculaas was, het hy baie oor homself geleer. \u201cMy uitkyk op die lewe is seker baie anders as di\u00e9 van ander mense omdat ek op \u2019n jong ouderdom blootgestel is aan mense wat gesterf het en intensiewe chemoterapie ondergaan het. Ek het op 13 vinnig grootgeword.\u201d<\/p>\n\n\n\n

Dit was ook hier in die hospitaal waar Herculaas deur \u2019n medepasi\u00ebnt, Oom Jurie Klopper, ge\u00efnspireer is om te begin oefen. \u201cHy was \u2019n dokter en het oefeninge in die hospitaal gedoen. Hy het geglo \u2019n gesonde liggaam lei tot \u2019n gesonde denkwyse, wat goed vir die siel is. Hy is later dood, maar dit het my bygebly.\u201d<\/p>\n\n\n\n

Herculaas, wat by Coetzenburg oefen, was gereed om die 800 m, 200 m, hoogspring en verspring by die Spele aan te pak voordat hy beseer is. \u201cEk is baie opgewonde vir die Spele, hoewel ek nie self kan deelneem nie,\u201d s\u00ea hy. <\/p>\n\n\n\n

Herculaas het voorheen in die o.16-ouderdomsgroep aan die 100 m-wedloop deelgeneem en aflos gehardloop, asook aan velditems soos verspring en gewigstoot. In sy velditems het hy \u2019n silwer- en bronsmedalje verower.<\/p>\n\n\n\n

In 2017 was hy terug by die nasionale spele en het hier met die 800 m-wedloop ook op die podium ge\u00ebindig.<\/p>\n\n\n\n

Deel van sy voorbereiding was oefen en gesond eet, maar Herculaas bieg soms het hy \u2019n KFC- of Steers-maaltyd geniet. Oefensessies voor 06:00 en draf in die namiddag het wel gehelp om Herculaas fris en gesond te hou.<\/p>\n\n\n\n

Benewens sy liefde vir atletiek is hy veral ge\u00efnteresseerd in ekonomie, filosofie en belegging \u2013 die veld waarin hy vandag werk. Hy het B.comm-beleggingsbestuur aan die Universiteit Stellenbosch studeer. <\/p>\n\n\n\n

Hy tokkel ook graag op die kitaar. <\/p>\n\n\n\n

Herculaas raai mense aan om as orgaanskenkers te registreer, indien dit in hul kultuur is en by hul etiese geloof inpas. \u201cJy kan iemand se lewe red, ongeag jou geloof, geslag of ras. Dit is die grootste beloning wat ek glo jy eendag kan kry as jy weet jy kon iemand help.<\/p>\n\n\n\n

\u201cMy oorplanting \u2013 beenmurg \u2013 het beteken hulle het \u2019n bloed-pasmaat vir my gevind. Ek was baie bevoorreg en het 14 Suid-Afrikaanse pasmaats gehad en twee internasionaal. Uiteindelik is \u2019n internasionale skenker gekies,\u201d s\u00ea hy.<\/p>\n\n\n\n

In die oes van die stamselle vir die oorplanting moes Herculaas se skenker se bloed van sy stamselle geskei word. Dit is toe n\u00e1 intensiewe chemoterapie in Herculaas oorgeplant.<\/p>\n\n\n\n

\u201cDie oorplanting het my lewe gered en ek is dankbaar vir die Here se genade. Nie almal kry \u2019n tweede kans in die lewe nie, maar die Here het my gese\u00ebn met \u2019n wonderwerk. Ek is dankbaar vir my skenker en dis baie ironies, want my gesin het destyds vanuit \u2019n gebied in Berlyn na Pole getrek, en dit was juis hier van waar my skenker, met wie ek DNS deel, gekom het.\u201d<\/p>\n\n\n\n