{"id":42748,"date":"2024-11-14T06:05:33","date_gmt":"2024-11-14T04:05:33","guid":{"rendered":"https:\/\/novanews.co.za\/eikestadnuus\/indringerplante-in-eikestad-bestry-20241113-2\/"},"modified":"2025-03-20T07:40:18","modified_gmt":"2025-03-20T05:40:18","slug":"indringerplante-in-eikestad-bestry-20241113-2","status":"publish","type":"post","link":"https:\/\/novanews.co.za\/eikestadnuus\/indringerplante-in-eikestad-bestry-20241113-2\/","title":{"rendered":"Indringerplante in Eikestad bestry"},"content":{"rendered":"\n

Die bestuur van natuurgebiede in en om Stellenbosch was onlangs onder die soeklig.<\/p>\n\n\n\n

\u201cDit was van groot belang vir die dorp en sy omgewing en sonder presedent,\u201d s\u00ea prof. Hans Eggers, die voorsitter van die Vriende van Stellenboschberg (FSM).<\/p>\n\n\n\n

Vier spanne inspekteurs van die nasionale departement van bosbou, visserye en omgewingsake se inspektoraat vir omgewingsbestuur (EMI) het sowat 130 eiendomme in die dorp en distrik inspekteer. Die groot natuurgebiede van CapeNature, die Stellenbosch-munisipaliteit en Mountain to Ocean (MTO) Kaapse roetes het spesiale aandag geniet, maar private eiendomme, riviere en kwekerye was ook op die lys.<\/p>\n\n\n\n

Die departement poog om te verseker die bestuur van sensitiewe gebiede word volgens die relevante wetgewing, veral wetgewing vir biodiversiteit, gedoen. Die departement is gemagtig om di\u00e9 wette af te dwing. <\/p>\n\n\n\n

Inspekteurs het veral gekyk na die beheer van indringerplante, onder meer wattel, denne en bloekoms. Di\u00e9 spesies is \u2019n bedreiging vir inheemse plante omdat hulle soveel vinniger vermeerder. <\/p>\n\n\n\n

Eggers verduidelik n\u00e1 elke veldbrand ontplof die spesies se getalle, omdat miljoene opgehoopte sade ontkiem en die plek van inheemse plante inneem.<\/p>\n\n\n\n

Die FSM is sedert 2008 aktief besig om uitheemse indringerplante te verwyder \u2013 veral in Paradyskloof se natuurgebied en die westelike hange van die Stellenboschberg. <\/p>\n\n\n\n

Die organisasie hou maandeliks vrywillige uitwissingsoptredes (hacks<\/span>) in Paradyskloof, waartydens indringerspesies uitgeroei word.<\/p>\n\n\n\n

Indien dit nie beheer word nie, vernietig die indringers later riviere en hele ekostelsels. Di\u00e9 soort spesies is ook \u2019n groot brandgevaar en vererger erosie.<\/p>\n\n\n\n

\u201cDrastiese optrede is dringend nodig om die verspreiding van indringers te stop en om te keer,\u201d s\u00ea Stiaan Kotze, die hoof van die departement se inspektoraat.<\/p>\n\n\n\n

\u201cDie gebrek om indringerplante te beheer, veroorsaak dat dinge veel erger word en kos die belastingbetaler en die land uiteindelik veel meer geld.\u201d<\/p>\n\n\n\n

Voorbereidings vir die onlangse plaaslike optrede het in 2021 reeds begin nadat die FSM aan die destydse minister van omgewingsake, Barbara Creecy, geskryf het.<\/p>\n\n\n\n

\u201cOns was baie bekommerd oor die verslegtende toestande in Paradyskloof, ons tuisgebied. Danksy uitstekende vroe\u00eb werk deur Working for Water en ons eie pogings, asook kontrakteurswerk, was indringerplante teen 2019 plaaslik meestal in bedwang. Sedertdien was daar egter \u2019n groot toename op die boonste hange van Stellenboschberg en in die laagliggende gebiede,\u201d s\u00ea Eggers, ook \u2019n medestigter van die FSM.<\/p>\n\n\n\n

\u201cOns het bewus geraak dat dieselfde probleme ook in onder meer Papegaaiberg, Botmaskop, Idasvallei en Mont Rochelle ontstaan. Die Stellenbosch-munisipaliteit het nie die nodige bronne verskaf om die probleem voldoende aan te durf nie. Ons het toe besluit om aan die minister te skryf.\u201d <\/p>\n\n\n\n

Die FSM was dus in hul noppies toe Creecy die omvang van ondersoeke uitgebrei het om alle natuurgebiede en nie net die munisipale gebied nie, in die distrik in te sluit. <\/p>\n\n\n\n

Eggers meen dit is sinvol, aangesien indringerplante vryelik oor eiendomsgrense heen migreer. \u201cAs jou buurman nie die wet op sy eiendom nakom nie, ly jy ook.\u201d<\/p>\n\n\n\n