{"id":87442,"date":"2023-03-29T07:31:40","date_gmt":"2023-03-29T05:31:40","guid":{"rendered":"https:\/\/novanews.co.za\/districtmailhelderberg\/macassar-gruvonds-verdagte-vas-na-denecke-moord-20230329-2\/"},"modified":"2025-03-20T06:47:36","modified_gmt":"2025-03-20T04:47:36","slug":"macassar-gruvonds-verdagte-vas-na-denecke-moord-20230329-2","status":"publish","type":"post","link":"https:\/\/novanews.co.za\/districtmailhelderberg\/macassar-gruvonds-verdagte-vas-na-denecke-moord-20230329-2\/","title":{"rendered":"Macassar-gruvonds: Verdagte vas n\u00e1 Denecke-moord"},"content":{"rendered":"\n

Die Macassar-polisie het Maandag (27 Maart) \u2019n verdagte in verband met die vermeende moord op Denecke Persence in hegtenis geneem.<\/p>\n\n\n\n

Di\u00e9 sukses volg nadat polisiebeamptes Maandagoggend \u2019n lasbrief vir die inhegtenisneming van die moordverdagte verkry en teen die middaguur uitgevoer het. Die 55-jarige sou na verwagting vanoggend (Woensdag 29 Maart) op die aanklag van moord in die Somerset-Wes-landdroshof verskyn.<\/p>\n\n\n\n

Volgens \u2019n Macassar-polisiewoordvoerder was die verdagte een van drie mense wat aanvanklik n\u00e1 die gruvonds vir ondervraging na die polisiekantoor geneem is, maar weens \u2019n gebrek aan genoegsame bewyse nog nie aangekla kon word nie. <\/p>\n\n\n\n

Die polisiewoordvoerder het by verdere navraag bevestig die lykskouing het \u2019n misdaad onthul en dat Denecke se doodsoorsaak verdrinking was.<\/p>\n\n\n\n

\u201cVerdere polisieondersoek het daartoe gelei dat getuies na vore gekom het en die inhegtenisneming moontlik gemaak is,\u201d het die polisiewoordvoerder ges\u00ea.<\/p>\n\n\n\n

DistriksPos & Helderberg Ga<\/em> zette<\/em> het verlede week berig DNS-toetsuitslae, wat verlede Maandag (20 Maart) ontvang is, positief met Denecke verbind is. Boonop is die 10-jarige ook in dieselfde T-hemp wat sy op die foto van die vermiste-persoon-kennisgewing aangehad het, gevind (\u201cLyk \u00eds toe di\u00e9 van jong Denecke\u201d, 22 Maart). <\/p>\n\n\n\n

Die nuwe verwikkelinge volg nadat nuus van Denecke se verdwyning aanvanklik Sondagoggend 12 Maart bekend geword het toe \u2019n kennisgewing wyd en syd via sosiale media versprei is en \u2019n beroep op die publiek gedoen is om die meisie, wat Saterdag 11 Maart omstreeks 14:00 laas in Zandvlietweg oorkant die taxistaanplek gesien is, te help opspoor. <\/p>\n\n\n\n

Volgens die pamfletbeskrywing het Denecke, wat lang bruin hare (in \u2019n bolla), bruin o\u00eb en \u2019n skraal liggaamsbou het, ten tyde van haar verdwyning \u2019n pienk, geel en wit toppie met blou jeans en swart tekkies aangehad. <\/p>\n\n\n\n

Nuus van die gruvonds in die gemeenskap het gou versprei en teen Sondagmiddag (12 Maart) is \u2019n lyk, wat vermoedelik di\u00e9 van Denecke was, in \u2019n toegegroeide kanaal langs Rembrandtlaan in Marvinpark gevind (\u201cTragedy strikes: Horrific discovery in Macassar canal,\u201d Netwerk24<\/em>, 12 Maart). Plaaslike owerhede is Sondag omstreeks 14:00 tot aksie geroep nadat die lyk deur lede van \u2019n soekgeselskap, wat sedert Denecke se verdwyning die Saterdagaand na haar gesoek het, in die kanaal ontdek is. Die liggaam, wat heeltemal onder water en met die gesig na onder deur \u2019n vragmotorband vasgepen was, is later ten aanskoue van \u2019n groot skare omstanders verwyder. <\/p>\n\n\n\n

\u2019n Geregtelike nadoodse ondersoek is deur die Macassar-polisie geopen en DNS-monsters is Dinsdag 14 Maart weggestuur omdat \u2019n formele uitkenning weens die ontbinding van die lyk nie sou kon bepaal of die lyk wel di\u00e9 van Denecke is nie (\u201cLyk van meisie dalk Denecke,\u201d 15 Maart).<\/p>\n\n\n\n

Intussen het die gruvonds geestelike leiers genoop om saam te span vir \u2019n massagebedsessie wat voorverlede Maandagaand (13 Maart) by die plek waar Denecke se liggaam ontdek is, gehou is. \u2019n Deurry-gedenkdiens vir die jongeling is verlede Donderdagaand (23 Maart) by die J-woonstelblok in Bass-straat gehou. <\/p>\n\n\n\n

Denecke is Sondag (26 Maart) uit die Ho\u00ebrskool Macassar se skoolsaal begrawe en in die Somerset-Wes-begraafplaas ter ruste gel\u00ea. <\/p>\n\n\n\n

Die begrafnisdiens is voorafgegaan deur \u2019n staptog van Marvinpark Prim\u00eare Skool tot by die skoolsaal waar talle rouklaers hul laaste eer aan die geliefde kind betoon het. Die begrafnisdiens is deur die laerskool se Randall Olsen gelei en die eerste spreker aan die woord was die Wyk 109-raadslid Peter Helfrich, wat as een van twee sprekers op die program eerste aan die woord was.<\/p>\n\n\n\n

\u201cWat met Denecke gebeur het, moes nooit gebeur het nie,\u201d het hy ges\u00ea. \u201cTerwyl almal van ons op die oomblik treur, is daar ook iets anders wat in ons broei. Die ding wat in ons almal broei, is \u2019n groeiende woede \u2013 woede vir die oortreders wat onder ons skuil soos die lafaards wat hulle is, wagtend vir hul geleentheid om ons vroue en kinders seer te maak wanneer niemand kyk nie. Dit is \u2019n bekende feit dat wanneer jy \u2019n slapende beer te\u00ebkom, jy dit nie moet wakker maak nie. Wat jy gedoen het toe jy aan Denecke geraak het \u2013 jy het die beer gesteek. Ons wyk was soos \u2019n slapende beer wat die misdadiger uitgelok het.\u201d<\/p>\n\n\n\n

\u2019n Deel van die begrafnisprogram was hartroerende sangitems deur Lavenia Philander en die Ferris-susters, \u2019n geestelike dansitem en \u2019n gedig deur Gerayshia Endley. Die boodskap deur pastoor Rodwill Prince is voorafgegaan deur \u2019n woord deur Anneline Hartzenberg en die huldeblyke van Leona van S\u00f6hnen en Althea Pieterse.<\/strong><\/p>\n\n\n\n

Die geestelike-teenmisdaad-komitee in Macassar het n\u00e1 die inhegtenisneming \u2019n aanlyn petisie ter teenstand van die verdagte se borgtog opgestel. Teen die koerant se druktyd gisteroggend (Dinsdag 28 Maart), het die petisie reeds 1 000 handtekeninge gehad. Die komitee-sekretaris, Auriel September, het ges\u00ea die petisie is genoodsaak deur die gruwelike misdaad wat tot onbeskryflike trauma gelei het en deur die gemeenskap veroordeel word.<\/p>\n\n\n\n

\u201cDie boodskap wat Macassar met die petisie uitstuur, is dat ons nie sulke misdade sal duld nie en nie sulke misdadigers in die samelewing wil h\u00ea nie,\u201d het September ges\u00ea.<\/p>\n\n\n\n

Sy het verder \u2019n beroep op gemeenskapslede gedoen om hul aksie te ondersteun en die petisie te teken sodat geregtigheid vir Denecke kan se\u00ebvier. <\/p>\n\n\n\n