{"id":66601,"date":"2022-08-24T09:21:43","date_gmt":"2022-08-24T07:21:43","guid":{"rendered":"https:\/\/novanews.co.za\/districtmailhelderberg\/gouws-saak-moordverdagtes-kry-borg-20220824\/"},"modified":"2025-03-20T15:25:55","modified_gmt":"2025-03-20T13:25:55","slug":"gouws-saak-moordverdagtes-kry-borg-20220824","status":"publish","type":"post","link":"https:\/\/novanews.co.za\/districtmailhelderberg\/gouws-saak-moordverdagtes-kry-borg-20220824\/","title":{"rendered":"Gouws-saak: moordverdagtes kry borg"},"content":{"rendered":"\n

Die twee verdagtes wat in verband met die grumoord op Strand-tiener Byron Gouws gearresteer is, is albei vrygelaat op borgtog. <\/p>\n\n\n\n

Die moordbeskuldigdes, Damian Morris (23) en Walter September (26) het Maandag (22 Augustus) in die Strand-landdroshof voorgekom en is tydens die hofverskyning borgtog toegestaan. Morris is op R2 000 borgtog vrygelaat terwyl September R1 000 moes opdok. <\/p>\n\n\n\n

Gouws se bedroefde pa, Ashford het sy skok oor die uitkoms uitgespreek veral nadat 1 100 gemeenskapslede \u2019n petisie geteken het in teenstanding van die moordbeskuldigdes se borg. \u201cEk het ontplof toe ek hoor my seun se vermeende moordenaars kry borgtog en is uit op vrye voet. Dit nadat hulle my seun koelbloedig vermoor het en daarna sy liggaam van die moordtoneel verwyder en op \u2019n ander plek gestort het. Dis belaglik. Hoe is dit moontlik dat hulle borg kry?\u201d het \u2019n verstaanbaar ontevrede Gouws gevra.<\/p>\n\n\n\n

Die ouer het voorverlede week aan DistriksPos & Helderberg Gazette<\/em> sy hart oopgemaak en vertel hoe hy met sy selfoon-liggie op sy 17-jarige seun se lewelose liggaam afgekom het (\u201cPa kry self sy tienerseun se lyk,\u201d Woensdag 10 Augustus). <\/p>\n\n\n\n

Byron se lyk is Sondag 31 Julie in Broadlandspark aangetref (\u201cTwee tienerseuns afgemaai,\u201d DistriksPos & Helderberg Gazette, Woensdag 3 Augustus). Dit nadat die tienerslagoffer na bewering deur twee mans met \u2019n byl en \u2019n mes aangeval en sy lyk is op \u2019n ander plek gestort is. <\/p>\n\n\n\n

Zorah Motasi, \u2019n Strand-gemeenskapsaktivis en voorsitter van die Vroue in Aksie-beweging, het ook meegedeel dat sy steier onder absolute skok oor die nuus. \u201cEk werk baie saam met die Strand-magistraatshof en wil nie my verhouding beskadig met hulle nie, maar ek wil op rekord gaan en vertel dat ek nie saamstem met hul besluit nie,\u201d het sy ges\u00ea. <\/p>\n\n\n\n

Sy het voorts vertel dat gemoedere hoog loop in die gemeenskap. \u201cDie gemeenskap voel dat daar \u2019n Dawid is vir elke Goliat. En die gemeenskap sien hulself as Dawid wat onderdruk word en sy stem moet dikmaak. Die gemeenskap is baie kwaad,\u201d het Motasi aangevoer.<\/p>\n\n\n\n

Niklaas Thysen, Strand Gemeenskapspolisi\u00ebringsforum (GPF) het ook hul gesamentlike ongelukkigheid oor die hof se besluit uitgespreek. <\/p>\n\n\n\n

\u201cDie twee vermeende moordenaars se borg is deur die hof bekragtig na die staat hul verto\u00eb gerig het en die ernstigheid van die misdaad uitgewys het. Die GPF gaan verdere navrae rig aan die hooflanddros oor waarom die verdagtes so vinnig borg gekry het n\u00e1 hulle \u2019n skedule 6 misdaad gepleeg het,\u201d het Thysen ges\u00ea.<\/p>\n\n\n\n

Verder raak die seer nie minder nie, het Gouws vertel. <\/p>\n\n\n\n

\u201cOns mis hom baie en ons is nie gelukkig oor die borgtog nie maar ons kan nie die saak belemmer nie en hoop dat die gereg sy gang loop en dat die verdagtes die regte vonnis opgel\u00ea word,\u201d het hy ges\u00ea.<\/p>\n\n\n\n

\u201cHulle s\u00ea dat die verdagtes nie \u2019n gevaar vir die gemeenskap is nie, maar hoekom wou gemeenskapslede dan die verdagtes se huise afbrand?\u201d vra Gouws. <\/p>\n\n\n\n