Die Macassar-polisie het ’n hernieude beroep gedoen op die Helderberg vir inligting wat moontlik kan help om die getal lyke wat binne ’n week in die gemeenskap ontdek is, te identifiseer.
Altesaam vier lyke, wat sedert verlede Saterdag (27 Mei) in Macassar gestort is, is in die gemeenskap ontdek. Die laaste lyk is die afgelope Saterdag (3 Junie) aangetref. Drie van die vier is steeds onbekend. Volgens die polisie werk hulle onverpoos aan leidrade vir ’n deurbraak in die onderskeie sake wat ondersoek word.
Die lyk van ’n man, wat vermoedelik die slagoffer van moord was, is verlede Sondagmiddag (28 Mei) in ’n beboste gebied in Macassar-weg gevind. Die voorval is voorafgegaan deur nog ’n gruvonds die vorige dag (Saterdagmiddag 27 Mei) toe die lyk van ’n onbekende vrou by Macassar-strand aangetref is (“Lyke gevind”, DistriksPos & Helderberg Gazette, Woensdag 31 Mei).
Die polisie is Saterdag omstreeks 07:00 deur ’n visserman, wat die lyk van die jong vrou op die water sien dryf het, na die toneel by die strand ontbied.
Die lyk was dié van ’n bruin vrou wat vermoedelik iets in die dertig is, en is deur owerhede uit die water gehaal. Die vrou was halfnaak. Die polisie het ’n geregtelike doodsondersoek geopen.
Owerhede is verlede Sondag omstreeks twaalfuur na die toneel van ’n tweede gruvonds naby die Macassar-rioolaanleg ontbied.
Met hul aankoms is die man met verskeie wonde aan die gesig aangetref. Die vermeende moordslagoffer was in ’n blou langmou-top, donker jeans en ’n oranje bib geklee. Volgens die polisie is die man intussen as ’n 29-jarige inwoner van Strand uitgeken. Sy naam kan nie bekend gemaak word nie omdat sy familie teen druktyd nog nie in kennis gestel is nie.
Die afgelope Donderdag (1 Junie) is nog ’n lyk omstreeks 16:30 in Macassar-weg, waar dit glo in ’n plas water gelê het, ontdek. Die Macassar-polisie het bevestig die lyk van ’n onbekende man, wat vermoedelik tussen 28 en 32 jaar oud is, is deur voetgangers in Sandvlei ontdek.
In die mees onlangse voorval die naweek (Saterdag 3 Junie) is ’n vierde lyk in die beboste gebied in Macassar-weg aangetref – ongeveer ’n kilometer van waar Donderdag se lyk gevind is.
Volgens Macassar se polisiewoordvoerder, AO Desire Adendolf, is die lyk van nog ’n onbekende man, wat Saterdag omstreeks 17:30 deur verbygangers by die Sandvlei-buurtwag oor die gruvonds ingelig is, ontdek. ’n Geregtelike doodsondersoek is geopen en ’n beroep word gedoen op mense om na vore te kom met inligting wat kan help om die swart man, wat sowat 36 jaar oud is, te identifiseer.
Die Wyk 109-raadslid Peter Helfrich het vantevore sy kommer uitgespreek oor die gruvondste wat voorkom asof dit ’n “tendens” word. In die lig van gister se vonds het Helfrich gesê Macassar het ’n gewilde plek geword vir misdadigers om lyke te stort. Hy gee ’n kombinasie van mislukkings deur Eskom en die polisie om die dienste te lewer wat hulle moet, die blaam daarvoor.
“Dit is baie duidelik dat byna al die lyke wat in die wyk gestort word, lyke is van mense wat nie in die wyk woon nie,” het hy gesê.
‘Minister moet blaam dra vir stygende misdaad’
Helfrich het verder aangevoer dit is “baie waarskynlik” dat die vermeende slagoffers elders vermoor is of omgekom het en in die Macassar-gemeenskap gestort is. Hy het ook die vinnige toename in die storting van lyke in sy wyk met die uitgebreide Eskom-kragonderbrekings, waaronder die gemeenskap erg gebuk gaan, verbind.
“Dit is nie die eerste keer dat lyke gevind word wat hier gestort is nie. Dit lyk of Macassar besig is om ’n stortplek vir lyke te word,” het Helfrich gesê.
“Dit is belangrik om te verstaan ??dat Macassar ’n gebied is wat deur Eskom van krag voorsien word. Dit maak my seer om dit te erken, maar inwoners in ons wyk het hulself in ’n sekere mate gedwing om vrede te maak met beurtkrag. Wat dit vir inwoners ondraaglik maak, is die langdurige kragonderbrekings wat begin wanneer beurtkrag eindig. Hierdie langdurige kragonderbrekings duur soms dae aaneen. Dit is onmenslik om van inwoners te verwag om bykomende kragonderbrekings te aanvaar bo en behalwe beurtkrag.
“Dit sal verkeerd wees van my om nie uit te wys dat die misdadige aktiwiteite, en veral die storting van lyke, in ons wyk saamval met beurtkrag en veral die langdurige kragonderbrekings wat ons ervaar nie.”
Die gemeenskap van Macassar is letterlik in die duister gelaat nadat ’n plaaslike substasie Maandag 1 Mei gevandaliseer is, wat veroorsaak het dat inwoners lang tydperke sonder elektrisiteit is ná elke aanval sedert die begin van die maand (“No electricity thanks to vandalising of substation”, 17 Mei). Op Maandag 22 Mei, presies 21 dae nadat Macassar en dele van Firgrove hierdie kragonderbrekings begin ervaar het, het Helfrich ’n brief aan pres. Cyril Ramaphosa gestuur in die hoop vir ’n oplossing (“Councillor, community plead for help,” 31 Mei). Maar die gemeenskap is egter nog ’n slag toegedien toe nog ’n voorval van kabeldiefstal Maandag 29 Mei aangemeld is en hierdie keer Sandvlei, Macassar-strand, die Kramat en Sitari sonder krag gelaat het.
“Macassar word deur ’n kragkrisis in die gesig gestaar en misdadigers trek voordeel hieruit. Die kragkrisis, tesame met die feit dat ons deur ’n polisiekantoor met ’n tekort aan hulpbronne bedien word, het regstreeks tot die toename in misdaad in die gebied gelei.
“Ek gee ook die skuld vir die toename in misdaad en moorde in ons wyk geheel en al vir die minister van polisie, Bheki Cele. Ek het verlede jaar aan die minister geskryf om hom te vra om ons plaaslike polisiekantoor van meer hulpbronne en personeel te voorsien om hulle in staat te stel om hul werk meer doeltreffend te doen. Hulle behoort ons plaaslike polisiekantoor só toe te rus dat dit volstoom kan funksioneer, wat die polisie ook meer sigbaar sal maak. Die minister se kantoor het belowe om na ons terug te kom nadat ek aan hom geskryf het. Hulle het dit nooit gedoen nie. Ons eis spoedige geregtigheid vir die slagoffers.”
Die gemeenskapsaktivis Felicity Solomons het gesê: “Wanneer jy soggens jou huis verlaat, het jy geen waarborg dat jy weer veilig by die huis gaan kom nie. Dit voel asof ons in ’n oorlogsone is met niemand om ons te beskerm nie. Ons is vergete en niemand gee om nie.
“Ons raadslid veg sedert sy aanstelling ??as wyksraadslid vir meer polisiehulpbronne, maar dit wil voorkom of dit op dowe ore val. Waarom word ons deur die minister van polisie geïgnoreer?”
