Die departement van water en sanitasie het eThekwini beveel om op te hou om water bo sy gelisensieerde limiete te onttrek nadat die stad nie daarin kon slaag om sy waterverbruik voldoende te verminder nie. Die nieregeringsorganisasie WaterCAN s\u00ea die stad se leierskap behoort aanspreeklik gehou te word eerder as gewone inwoners.<\/p>\n\n\n\n
Die departement het sedert 2023 herhaaldelik toegewings aan die stad toegestaan, maar die eThekwini-munisipaliteit se verontagsaming van die streek se watersekerheid plaas groot dele van KwaZulu-Natal in gevaar.<\/p>\n\n\n\n
In \u2019n brief aan die eThekwini-burgemeester, Cyril Xaba, het die minister van water en sanitasie, Pemmy Majodina, ges\u00ea dat die vereiste vermindering in waterverbruik wat in Augustus 2025 belowe is \u2013 \u2019n vermindering van 1% per maand oor agt maande \u2013 nie bereik is nie.<\/p>\n\n\n\n
Die departement het gewaarsku dat voortgesette wateronttrekking bo die gelisensieerde perke die risiko van ernstige beperkings en moontlike stelselonderbrekings in die streek se watervoorsieningstelsel verhoog.<\/p>\n\n\n\n
Die departement se besluit kom te midde van ernstige probleme met die stad se waterstelsel en \u2019n groot afhanklikheid van watertenkwaens. Volgens die departemnet is die kern van die krisis dat die stad \u2019n onvermo\u00eb het om sy waterinfrastruktuur in stand te hou en te herstel.<\/p>\n\n\n\n
Een van die departement se redes vir die besluit was dat indien die stad toegelaat sou word om voort te gaan met oormatige wateronttrekking, dit die risikoprofiel in die streek verder kon verhoog in die lig van die voorspelde sterk El Ni\u00f1o-verskynsel, wat na verwagting tot aan die einde van die 2026\/\u201927-somerseisoen sal voortduur.<\/p>\n\n\n\n
Die stad kan ook weens \u2019n tekort aan loodgieters, voertuie en ander noodsaaklike hulpbronne nie daarin slaag om waterlekkasies en ander probleme op te los nie. Volgens die departement genereer 55,6% van die water wat eThekwini se waterstelsel binnekom, nie inkomste vir die munisipaliteit nie, onder meer weens die waterlekkasies en probleme met die stad se infrastruktuur.<\/p>\n\n\n\n
Volgens die departement het die aantal onopgeloste waterfoute van 744 in November 2025 tot 14 776 teen Mei 2026 toegeneem. Dit het pogings om waterverliese en die vraag na water te verminder, aansienlik ondermyn.<\/p>\n\n\n\n
Vertragings met die aanstelling van eksterne loodgieterskontrakteurs het ook die herstel van lekkasies en ander maatre\u00ebls om nie-inkomste-genererende water te verminder, belemmer.<\/p>\n\n\n\n