{"id":334979,"date":"2026-09-16T17:00:00","date_gmt":"2026-09-16T15:00:00","guid":{"rendered":"https:\/\/novanews.co.za\/diepapier\/?p=334979"},"modified":"2026-09-16T16:12:23","modified_gmt":"2026-09-16T14:12:23","slug":"francois-jacobs-ontdek-die-mense-agter-die-goeie-dade","status":"publish","type":"post","link":"https:\/\/novanews.co.za\/diepapier\/francois-jacobs-ontdek-die-mense-agter-die-goeie-dade\/","title":{"rendered":"Francois Jacobs ontdek die mense agter die goeie dade"},"content":{"rendered":"\n

\u2019n Warm bord kos, ondersteuning vir kinders met gestremdhede of \u2019n geleentheid vir jong sporttalent: in VIA se nuwe reeks Tafel-toere<\/em> ontdek Francois Jacobs hoe mense regoor Suid-Afrika \u2019n verskil in hul gemeenskappe maak.<\/p>\n\n\n\n

Di\u00e9 reeks van vyf episodes, wat deur Round Table en SANBS moontlik gemaak word, begin op 16 September en word Woensdae om 18:00 op VIA uitgesaai.<\/p>\n\n\n\n

In Tafel-toere<\/em> reis Jacobs saam met Round Table Southern Africa na verskillende dorpe en gemeenskappe om hul mooi \u00e9n hul uitdagings te leer ken. <\/p>\n\n\n\n

Elke episode begin by dit wat \u2019n plek besonders maak, voordat dit die aandag vestig op \u2019n plaaslike behoefte en die mense wat reeds werk om daarin te voorsien. Jacobs kyk nie bloot van die kantlyn af nie: hy spring self in, help met die projekte en ontmoet die mense wie se lewens daardeur geraak word.<\/p>\n\n\n\n

Vir Jacobs, wat kykers grootliks as akteur ken, was die reeks \u2019n kans om sy belangstelling in aanbiedingswerk verder uit te leef \u00e9n meer oor Round Table se werk te leer. Hy het reeds as tiener gewonder wat di\u00e9 organisasie doen. Nou kon hy dit van naderby beleef.<\/p>\n\n\n\n

\u201cDit het my werklik diep getref om te sien hoe hulle die gemeenskap help,\u201d s\u00ea hy.<\/p>\n\n\n\n

\"Foto:
Groot pret in Kirkwood. Foto: Verskaf<\/figcaption><\/figure>\n\n\n\n

Die reis neem kykers onder meer na die Oos-Kaap, waar \u2019n jagkompetisie en \u2019n toer met ou motors wys hoe stokperdjies ook geld vir gemeenskapsprojekte kan insamel. Vir Jacobs l\u00ea die waarde juis daarin dat mense iets waarvan hulle hou, gebruik om ander te ondersteun.<\/p>\n\n\n\n

\u201cDie feit dat mense ietsie lekkers kan kombineer en in die proses vir die gemeenskap self iets kan teruggee, was vir my regtig \u2019n mooi en verrykende ervaring.\u201d<\/p>\n\n\n\n

In die Wes-Kaap besoek die span onder meer \u2019n projek wat honderde mense weekliks van warm kos voorsien, asook \u2019n projek wat mense met swak sig help. Die sopkombuis het \u2019n besonder diep indruk op Jacobs gemaak. Hier werk Round Table, boere en gemeenskapslede saam om groente, vleis, brood en ander benodigdhede bymekaar te maak.<\/p>\n\n\n\n

\"Foto:
Foto: Verskaf<\/figcaption><\/figure>\n\n\n\n

\u201cMet hierdie sopkombuis het ek regtig \u2019n traan gepik,\u201d s\u00ea hy.<\/p>\n\n\n\n

Di\u00e9 besoek het hom opnuut bewus gemaak van hoeveel gesinne sukkel om kos op die tafel te sit, en hoeveel \u2019n enkele maaltyd kan beteken.<\/p>\n\n\n\n

In Welkom besoek Jacobs die Amari Skool. Die reeks maak ook \u2019n draai by \u2019n plek wat kinders en jong volwassenes met Down-sindroom ondersteun. Die toewyding van die mense wat di\u00e9 ondersteuning bied, en die aandag aan daaglikse vaardighede wat ander maklik as vanselfsprekend aanvaar, het hom aangegryp. By Amari was die skoolkonsert \u2019n hoogtepunt wat ook die leerders se talent na vore gebring het.<\/p>\n\n\n\n

Van Pretoria tot Polokwane ontmoet die span verder mense wat ander help om n\u00e1 groot verlies weer \u2019n begin te maak, en jong talent ondersteun. In Polokwane hoor Jacobs van \u2019n skool se jaarlikse fondsinsamelings vir kinders wat nie skoolbywoning kan bekostig nie \u2014 onder hulle talentvolle netbal- en rugbyspelers wat op nasionale vlak meeding.<\/p>\n\n\n\n

Deur di\u00e9 ontmoetings vertel Tafel-toere<\/em> die verhale van mense wat plaaslike behoeftes raaksien en iets daaraan doen. Dit is \u2019n reis deur Suid-Afrikaanse dorpe, maar ook \u2019n blik op wat moontlik word wanneer \u2019n gemeenskap saamwerk.<\/p>\n\n\n\n

\"Foto:
Foto: Verskaf<\/figcaption><\/figure>\n\n\n\n