{"id":333644,"date":"2026-09-08T11:15:00","date_gmt":"2026-09-08T09:15:00","guid":{"rendered":"https:\/\/novanews.co.za\/diepapier\/?p=333644"},"modified":"2026-09-08T10:46:33","modified_gmt":"2026-09-08T08:46:33","slug":"kragtoer-deur-emmy-benoemde-kim-engelbrecht-vanjaar-by-woordfees","status":"publish","type":"post","link":"https:\/\/novanews.co.za\/diepapier\/kragtoer-deur-emmy-benoemde-kim-engelbrecht-vanjaar-by-woordfees\/","title":{"rendered":"Kragtoer deur Emmy-benoemde Kim Engelbrecht vanjaar by Woordfees"},"content":{"rendered":"\n

Die bekroonde Suid-Afrikaanse aktrise Kim Engelbrecht, wat in 2022 vir \u2019n internasionale Emmy-toekenning benoem is, sal in Oktober by die Toyota Stellenbosch Woordfees te sien wees in A Woman Alone<\/em> \u2013 die donker, skreeusnaakse eenvroustuk wat vroe\u00ebr vanjaar die vinnigste verkoper \u00e9n die eerste uitverkoopte produksie by die Suidoosterfees was. <\/p>\n\n\n\n

\"Foto:
Foto: Hans van der Veen<\/figcaption><\/figure>\n\n\n\n

Engelbrecht, wat oor die jare \u2019n bekende gesig op Suid-Afrikaanse \u00e9n internasionale televisieskerms geword het, is vir haar rol in Reyka<\/em> vir \u2019n internasionale Emmy in die kategorie Beste spel deur \u2019n aktrise benoem. Haar indrukwekkende loopbaan sluit ook rolle in Isidingo<\/em>, Dominion<\/em> en die Amerikaanse reeks The Flash<\/em> in.<\/p>\n\n\n\n

Met A Woman Alone<\/em> keer sy terug na die teatermedium wat reeds van kleins af deel van haar lewe is. <\/p>\n\n\n\n

\u201cEk het nog altyd tot teater aangetrokke gevoel, maar die afgelope klompie jare het ek meer van \u2019n film- en televisie-aktrise geword,\u201d s\u00ea Engelbrecht.<\/p>\n\n\n\n

Haar eerste verhoogverskyning was reeds op sesjarige ouderdom, toe sy Tinkerbell in \u2019n laerskoolproduksie van Captain Hook<\/em> gespeel het. Later was sy onder meer te sien in Janice Honeyman se pantomimes by die Joburg Theatre, Ben Elton se Popcorn<\/em>, Shakespeare in the Park se A Midsummer Night\u2019s Dream<\/em> en Kroes<\/em>, wat destyds deur Saartjie Botha, nou direkteur van die Toyota Stellenbosch Woordfees, vervaardig is.<\/p>\n\n\n\n

\u2019n Gehoorgunsteling by Suidoosterfees<\/h3>\n\n\n\n
\"Foto:
Foto: Hans van der Veen<\/figcaption><\/figure>\n\n\n\n

Kaapse gehore het vroe\u00ebr vanjaar na A Woman Alone<\/em> gestroom toe die produksie by die Suidoosterfees gedebuteer het. Nou kry Stellenbosch se gehore op 3, 4 en 6 Oktober ook kans om di\u00e9 gewilde verhoogstuk te beleef.<\/p>\n\n\n\n

Engelbrecht speel onder regie van Quanita Adams, met Charlton George as assistentregisseur. A Woman Alone<\/em> is geskryf deur die legendariese Italiaanse teatermakers Franca Rame en Dario Fo en verweef klug, satire en drama in die verhaal van \u2019n huisvrou wie se o\u00ebnskynlik alledaagse bestaan allesbehalwe gewoon blyk te wees.<\/p>\n\n\n\n

Wanneer die gehoor haar in die skynbaar veilige ruimte van haar huis ontmoet, lyk alles op die oog af normaal. Maar di\u00e9 indruk verander egter gou. <\/p>\n\n\n\n

\"Foto:
Foto: Hans van der Veen<\/figcaption><\/figure>\n\n\n\n

\u201cSoos die verhaal ontvou, besef jy vinnig dat haar lewe chaoties is,\u201d s\u00ea Engelbrecht.<\/p>\n\n\n\n

Die karakter staan voor verskeie uitdagings: sy sukkel om \u2019n band met haar kinders te vorm, \u2019n meedo\u00ebnlose agtervolger is op haar spoor, daar is \u2019n gebroke minnaar en \u2019n swaer wat haar betas. Tog omskep Rame en Fo hierdie ontstellende werklikheid in teater wat beide ongemaklik \u00e9n uitbundig snaaks is.<\/p>\n\n\n\n

Steeds relevant na byna 50 jaar<\/h3>\n\n\n\n

A Woman Alone<\/em> is die eerste keer in 1977 opgevoer en laat die kollig val op kwessies soos die onderdrukking \u00e9n bevryding van vroue, asook die boksies waarin die samelewing vroue dwing. Byna \u2019n halfeeu later vind Engelbrecht dat die stuk steeds tot ons samelewing spreek. <\/p>\n\n\n\n

\"Foto:
Foto: Hans van der Veen<\/figcaption><\/figure>\n\n\n\n

\u201cEk dink dit praat oor die vele gesigte wat ons het, al die rolle wat vroue vervul en hoe perfek ons dit leer bemeester. Dit kyk ook na hoe ons soms humor gebruik om ons stryd weg te steek.<\/p>\n\n\n\n

\"Foto:
Foto: Hans van der Veen<\/figcaption><\/figure>\n\n\n\n

\u201cDit beklemtoon terselfdertyd die skoonheid van vroue \u2013 ons vasberadenheid om die beste te maak van omstandighede wat nie altyd volmaak is nie. Dit gaan oor vroue se onvervulde behoeftes en die stil stryd wat ons voer, maar ook oor hoe sterk ons is.\u201d<\/p>\n\n\n\n

Terug Stellenbosch toe<\/h3>\n\n\n\n
\"Foto:
Foto: Hans van der Veen<\/figcaption><\/figure>\n\n\n\n

Die Woordfees-speelvak het besondere betekenis vir Engelbrecht en Adams. Jare gelede het hulle saam in Kroes<\/em> by die fees gespeel, waar hulle die rolle van beste vriendinne vertolk het. Dit was ook tydens di\u00e9 produksie dat hul eie vriendskap begin het. Nou keer Engelbrecht terug Stellenbosch toe, di\u00e9 keer met Adams in die regisseurstoel.<\/p>\n\n\n\n

\u201cHierdie produksie is vir ons \u2019n volsirkel-oomblik en ek is so opgewonde dat ek dit saam met Quanita kon doen. Dit is \u2019n droom wat waar word,\u201d s\u00ea Engelbrecht.<\/p>\n\n\n\n

Haar bande met Stellenbosch strek ook verder as die verhoog. \u201cEk het familie in Jamestown, dus besit di\u00e9 plek my hart.\u201d<\/p>\n\n\n\n

Deel van \u2019n w\u00eareldwye viering<\/h3>\n\n\n\n
\"Foto:
Foto: Hans van der Veen<\/figcaption><\/figure>\n\n\n\n

Die 2026-speelvak van A Woman Alone<\/em> val saam met die honderdste herdenking van Dario Fo se geboorte. Fo, wat in 1997 met die Nobelprys vir Letterkunde bekroon is, is in 1926 gebore.<\/p>\n\n\n\n

Die Fondazione Fo Rame in Itali\u00eb vier sy eeufees met \u2019n internasionale program wat die werk en nalatenskap van Fo en Rame w\u00eareldwyd belig. <\/p>\n\n\n\n

\"Dario
Dario Fo. Foto: Instagram<\/figcaption><\/figure>\n\n\n\n

Die Suid-Afrikaanse produksie van A Woman Alone<\/em> \u2013 van sy Suidoosterfees-debuut tot die komende Woordfees-speelvak \u2013 vorm deel van hierdie internasionale viering.<\/p>\n\n\n\n

Vir Engelbrecht bied die produksie aan Suid-Afrikaanse gehore die geleentheid om Fo en Rame se besonderse teaterstyl binne \u2019n plaaslike konteks te ervaar. <\/p>\n\n\n\n

\u201cGehore moet Italiaanse teater in \u2019n Suid-Afrikaanse konteks sien \u2013 hoe Dario Fo en Franca Rame se genre en styl so pragtig op ons verho\u00eb werk,\u201d s\u00ea sy.<\/p>\n\n\n\n

\"Foto:
Foto: Hans van der Veen<\/figcaption><\/figure>\n\n\n\n

\u201cDit is \u2019n revolusion\u00eare teaterstyl wat antieke Italiaanse klug met skerp politieke satire en sosiale aktivisme vermeng. Die stuk is baie donker, maar ook skreeusnaaks.\u201d<\/p>\n\n\n\n

N\u00e1 die uitstekende ontvangs van A Woman Alone<\/em> by die Suidoosterfees kry di\u00e9 werk nou \u2019n tweede Suid-Afrikaanse feesspeelvak \u2013 en nog \u2019n kans om te wys waarom \u2019n Italiaanse stuk wat byna 50 jaar gelede geskryf is, steeds \u2019n hedendaagse gehoor kan laat lag, ongemaklik laat rondskuif en hulleself laat raaksien.<\/p>\n\n\n\n

\"'A
‘A woman alone’<\/figcaption><\/figure>\n\n\n\n

A Woman Alone<\/em> is \u2019n ko-produksie van die Suidoosterfees<\/a> en Toyota Stellenbosch Woordfees<\/a>, moontlik gemaak deur die Festival Enterprise Catalyst<\/a> (FEC), The Jobs Fund <\/a>en Nando\u2019s<\/a>.<\/p>\n\n\n\n