{"id":330398,"date":"2026-08-19T12:16:32","date_gmt":"2026-08-19T10:16:32","guid":{"rendered":"https:\/\/novanews.co.za\/diepapier\/?p=330398"},"modified":"2026-08-19T12:16:35","modified_gmt":"2026-08-19T10:16:35","slug":"elektrisien-uit-die-noord-kaap-wys-vonk-in-die-kombuis-en-wen-masterchef-sa","status":"publish","type":"post","link":"https:\/\/novanews.co.za\/diepapier\/elektrisien-uit-die-noord-kaap-wys-vonk-in-die-kombuis-en-wen-masterchef-sa\/","title":{"rendered":"Elektrisi\u00ebn uit die Noord-Kaap wys vonk in die kombuis en wen Masterchef SA"},"content":{"rendered":"\n

Suid-Afrika se\u00a0Masterchef-wenner Andrew Benjamin, oftewel Benjie Baby soos hy op die televisieprogram bekend gestaan het, sal Woensdag in Kimberley tuiskom nadat hy op Sondagaand, 16 Augustus, in die eindronde van die jongste Masterchef-tuiskok-kookkompetisie koning gekraai het oor die naaswenner, Candice Meth van KwaZulu-Natal.<\/p>\n\n\n\n

Benjamin en Meth het 120 minute gekry om \u2019n driegangmaaltyd te berei wat hul reis in die kompetisie weerspie\u00ebl. Benjamin het pangebraaide salm met preie en \u2019n witwynsous as sy voorgereg bedien; gevolg deur varkpens met vinkel-en-appelpuree, ertjiemoes en \u2019n rooiwyn-jus. Vir nagereg het hy \u2019n
meringue, vanielje-sponskoek, sjokoladeroom-p\u00e2tissi\u00e8re met framboos coulis en vanieljeroomys bedien.<\/p>\n\n\n\n

\u2018Ek is gek oor werk as elektrisi\u00ebn, \u00e9n mal oor kook\u2019<\/h2>\n\n\n\n

Di\u00e9 Kimberliet wat aan die Laerskool en Ho\u00ebrskool Homevale skoolgegaan het, het al kleintyd saam met sy ouma Aletta Benjamin in die kombuis gekook. Hy het \u2019n plakboek gemaak en resepte daarin geplak en geskryf.<\/p>\n\n\n\n

\u201cOngelukkig was daar nie geld om n\u00e1 matriek na \u2019n sjefskool in Bloemfontein te gaan vir verdere studie nie,\u201d vertel hy.<\/p>\n\n\n\n

Hy het toe \u2019n elektrisi\u00ebn geword, en werk steeds by Eskom; deesdae in die Nasionale Transmissie-maatskappy van Suid-Afrika (NTCSA). Hy kon aan die einde van verlede jaar, toe die Masterchef-episodes opgeneem is, vooruit verlof vat om deel te neem.<\/p>\n\n\n\n

\"Andrew
Andrew Benjamin op die stel van Masterchef, omring met sy gesinslede en ander ondersteuners. Foto: Verskaf.<\/figcaption><\/figure>\n\n\n\n

\u201cEk is gek oor my werk as elektrisi\u00ebn, \u00e9n mal oor kook. Ek bied van tyd tot tyd opwip-restaurant-etes by die McGregor-museum se Dunluce House-museum, waarmee ek sal aanhou.\u201d<\/p>\n\n\n\n

Hy gaan sy prysgeld van meer as R1 miljoen gebruik om sy kombuis op te knap, op aandrang van sy vrou, Salom\u00e9.<\/p>\n\n\n\n

\u201cEk sal haar en ons kinders, die tweeling Andrew en Alicia (8), en seun Allistair (5), ook bederf met \u2019n wegbreek-vakansie en presente. Hulle s\u00ea juis hulle moet beloon word omdat hulle agt maande lank moes stilbly daaroor dat ek die wenner is.<\/p>\n\n\n\n

\u201cMy gesin was op die TV-ateljee-stel met die opname van die laaste twee episodes, wat wonderlik was. As ek verloor het, sou hulle leer en besef dit is deel van die lewe.\u201d<\/p>\n\n\n\n

Sy werkmense het heeltyd probeer uitvis wie die wenner was, \u201cmaar ek het hulle ges\u00ea ek het vergeet.\u201d<\/p>\n\n\n\n