President Cyril Ramaphosa het Maandagoggend die bedanking van advokaat Andrea Johnson as hoof van die Ondersoekdirektoraat teen Korrupsie (IDAC) aanvaar.<\/p>\n\n\n\n
Johnson het Sondag versoek om met “onmiddellike ingang” uit haar amp onthef te word ten spyte daarvan dat sy volgens haar kontrak drie maande kennis moet gee. In die brief het sy aangedui dit sal “die instellings en die land die beste dien”.<\/p>\n\n\n\n
“Dit is \u2019n moeilike versoek om te rig, gegewe die absolute liefde en toewyding waarmee ek die amp van ondersoekdirekteur van IDAC beklee het,” het sy geskryf.<\/p>\n\n\n\n
Sy het ook onthul dat sy reeds om aftrede aansoek gedoen het nadat sy die ouderdom van 55 bereik het, maar gevrees het dat di\u00e9 proses die onderwerp van regsgedinge teen sowel die Presidensie as die Nasionale Direkteur van Openbare Vervolgings (NDOV) kan word.<\/p>\n\n\n\n
“Advokaat Johnson het haar versoek om onmiddellike ontheffing uit haar amp aan die Nasionale Direkteur van Openbare Vervolgings en president Ramaphosa gerig,” het die Presidensie Maandagoggend in \u2019n verklaring bevestig.<\/p>\n\n\n\n
Die president het Johnson bedank vir haar diens aan die Nasionale Vervolgingsgesag (NVG).<\/p>\n\n\n\n
“Die president verseker die leierskap en personeel van die NVG van die regering se onwrikbare steun vir hul werk in die stryd teen misdaad en korrupsie,” lui die verklaring.<\/p>\n\n\n\n
Dit het intussen by die Madlanga-kommissie aan die lig gekom dat Johnson \u2019n ondersoek na agt senior Misdaadintelligensie-beamptes en \u2019n burger gemagtig het sonder dat daar \u2019n regsgrondslag daarvoor was.<\/p>\n\n\n\n
Haar versoek volg op \u2019n moeilike verskyning verlede week voor die Madlanga-kommissie van ondersoek, waar sy aan intense ondervraging onderwerp is.<\/p>\n\n\n\n
Johnson se getuienis voor die kommissie het vrae laat ontstaan oor die eenheid se besluitneming.<\/p>\n\n\n\n
Sy het onder skoot gekom nadat sy toegegee het dat IDAC die hoof van Misdaadintelligensie se Tegniese Ondersteuningsdienste, brigadier Dineo Mokwele, op grond van verkeerde inligting in hegtenis geneem en vervolg het.<\/p>\n\n\n\n