{"id":326109,"date":"2026-07-24T10:52:43","date_gmt":"2026-07-24T08:52:43","guid":{"rendered":"https:\/\/novanews.co.za\/diepapier\/?p=326109"},"modified":"2026-07-24T11:18:24","modified_gmt":"2026-07-24T09:18:24","slug":"nuwe-vsa-tariewe-dis-hoekom-dit-daar-nou-125-invoertariewe-op-sa-produkte-gehef-word","status":"publish","type":"post","link":"https:\/\/novanews.co.za\/diepapier\/nuwe-vsa-tariewe-dis-hoekom-dit-daar-nou-125-invoertariewe-op-sa-produkte-gehef-word\/","title":{"rendered":"Nuwe VSA-tariewe: D\u00eds hoekom daar nou 12,5% invoertariewe op SA produkte gehef word"},"content":{"rendered":"\n

Amerikaners betaal nou 12,5%-tariewe op Suid-Afrikaanse invoere, nie meer 10% nie.<\/p>\n\n\n\n

Die bykomende 2,5% kom nadat die Amerikaanse handelsverteenwoordiger Donderdag besluit het om \u2019n bykomende tarief kragtens art. 301 van die Amerikaanse handelswet in te stel.<\/p>\n\n\n\n

Dit volg op \u2019n ondersoek na 60 ekonomie\u00eb, wat Suid-Afrika insluit, oor die vraag of hulle self die invoer van goedere wat deur dwangarbeid vervaardig is, verbied, en di\u00e9 verbod doeltreffend afdwing.<\/p>\n\n\n\n

Vir Amerika maak dit saak, want hy reken as hierdie wette ni\u00e9 deur sy handelsvennote afgedwing word nie, word Amerikaanse ondernemings benadeel. Dis hoofsaaklik omdat hierdie goedere waarskynlik goedkoper sal wees en dit vir Amerika moeilik maak om effektief mee te ding.<\/p>\n\n\n\n

Belanghebbendes uit Suid-Afrika se privaat sektor, georganiseerde landbou en \u2019n tegniese span van die departement van handel, nywerheid en mededinging het twee weke gelede voor die handelsverteenwoordiger verskyn om verto\u00eb te rig.<\/p>\n\n\n\n

Suid-Afrika het in mondelinge getuienis beklemtoon dat die land oor wetgewing beskik wat dwangarbeid verbied en dat daar wetgewing is wat dit kan aanspreek, sou dit nodig wees. Maar die pleidooie het op dowe ore geval.<\/p>\n\n\n\n

Jamieson Greer, die handelsverteenwoordiger, het in \u2019n verklaring ges\u00ea Amerika is die \u201cenigste land ter w\u00eareld\u201d wat die invoer van goedere wat deur dwangarbeid vervaardig is, verbied.<\/p>\n\n\n\n

\u201cPres. (Donald) Trump vra al die handelsvennote om Amerika te ondersteun om dwangarbeid uit w\u00eareldvoorsieningskettings te verwyder,\u201d lui die verklaring.<\/p>\n\n\n\n

Die jongste verwikkelinge kom tydens \u2019n voortgaande hofproses rakende die \u201cwederkerige\u201d tariewe wat Trump in 2025 op lande regoor die w\u00eareld ingestel het.<\/p>\n\n\n\n

Trump het \u2019n astronomiese 30% op Suid-Afrika ingestel.<\/p>\n\n\n\n

In Februarie vanjaar het die Amerikaanse federale hooggeregshof hierdie tariewe egter ongeldig verklaar, en Trump het \u2019n tydelike 10% ingestel, hangende die uiteinde van sy app\u00e8lproses.<\/p>\n\n\n\n

\"Roelf
Roelf Meyer in sy huis in Silver Lakes, Pretoria. Foto: Danie Bester.<\/figcaption><\/figure>\n\n\n\n

Roelf Meyer, die nuwe Suid-Afrikaanse ambassadeur in Washington, het vandeesweek aan Die Papier<\/em> ges\u00ea<\/a> hy prioritiseer ook onderhandelinge rakende die Amerikaanse Wet op Groei en Geleenthede in Afrika (Agoa), waaruit Suid-Afrika voordeel trek.<\/p>\n\n\n\n

Agoa is net tot 31 Desember vanjaar verleng en Suid-Afrika hoop dat dit verder verleng kan word en dat di\u00e9 land sal deel bly van die groep lande wat danksy Agoa voorkeurtariewe geniet.<\/p>\n\n\n\n

\u201cDaai proses moet uit die aard van die saak gestalte kry. Die vraag is: Gaan die kongres wel nog kan besluite neem daaroor voordat hy in reses gaan vir die verkiesing?\u201d het Meyer ges\u00ea, en verwys na Amerika se middeltermynverkiesings wat in November vanjaar plaasvind.<\/p>\n\n\n\n