{"id":319582,"date":"2026-06-05T16:06:56","date_gmt":"2026-06-05T14:06:56","guid":{"rendered":"https:\/\/novanews.co.za\/diepapier\/?p=319582"},"modified":"2026-06-06T09:16:40","modified_gmt":"2026-06-06T07:16:40","slug":"avonturier-loods-nuwe-soektog-na-rietbok-vliegtuig","status":"publish","type":"post","link":"https:\/\/novanews.co.za\/diepapier\/avonturier-loods-nuwe-soektog-na-rietbok-vliegtuig\/","title":{"rendered":"Avonturier loods nuwe soektog na Rietbok-vliegtuig"},"content":{"rendered":"\n

Byna ses dekades nadat die Suid-Afrikaanse Lugdiens (SAL) se Viscount-vliegtuig Rietbok in die see naby Oos-Londen neergestort het, is Wouter Botes, \u2019n avonturier, weer op pad om na die wrak te gaan soek. <\/p>\n\n\n\n

\u201cDie Rietbok-ramp bly een van die bekendste tragedies in Suid-Afrikaanse burgerlugvaartgeskiedenis en wek steeds belangstelling onder familielede, navorsers en lugvaartentoesiaste.\u201d <\/p>\n\n\n\n

Hy s\u00ea sommige familielede van die 25 passasiers wat in die vlugramp dood is, dring steeds aan op antwoorde oor waarom die vliegtuig op 13 Maart 1967 onderweg van die destydse Port Elizabeth na Oos-Londen neergestort het.<\/p>\n\n\n\n

Botes, ook \u2019n dokkie-aanbieder, en sy span vertrek einde September na die Oos-Kaapse-kus om weer te probeer om dele van die wrak van die SAL-vliegtuig te herwin. Die ekspedisie bestaan uit vyf duikers, twee mediapersone en \u2019n volledige filmspan. Dit word ondersteun deur verskeie borge n\u00e1 jare se navorsing en voorbereiding sedert die wrak die eerste keer in 2022 gevind is.<\/p>\n\n\n\n

\u201cMy navorsing, en talle ander vlie\u00ebniers se opinies dui daarop dat dit die vlie\u00ebnier, Kaptein Gordon Lipawsky, se skuld was en dat daar niks fout was met die SAL-vlug nie,\u201d s\u00ea hy. \u201cDit beteken dat die families wat geld wil eis by SAL vir die tragedie nie kan nie, en ook nie teen die vlie\u00ebnier omdat hy ook op die vlug oorlede is.\u201d<\/p>\n\n\n\n

Volgens Botes het verskeie familiegroepe oor die afgelope paar jaar instellings genader om die saak te laat heroorweeg, insluitend die Suid-Afrikaanse Erfenishulpbronagentskap (Sahra), provinsiale owerhede en uiteindelik die Nasionale Vervolgingsgesag (NVG).<\/p>\n\n\n\n

Hy s\u00ea dokumentasie is in November 2025 by die NVG ingedien met \u2019n versoek vir heropening van die saak, op inisiatief van Aaron M. Goodman, wie se ouma se tante onder die passasiers was. \u201cEk verstaan dat die familie antwoorde wil h\u00ea, veral as hulle voel die ondersoek destyds was nie voldoende nie,\u201d s\u00ea Botes.<\/p>\n\n\n\n

\"Wouter
Wouter Botes. Foto: Verskaf.<\/figcaption><\/figure>\n\n\n\n

Volgens hom moet die NVG nog bevestig of daar genoegsame gronde bestaan vir verdere ondersoek of regsaksie. Hy wys ook daarop dat die saak in die verlede aandag van die Waarheids- en Versoeningskommissie (WVK) gekry het weens aantuigings dat die vlug deur die regering saboteer is. Die (WVK) kon in sy finale verslag in 1998 geen definitiewe bewyse vind dat die apartheidsregering of sy veiligheidsmagte die Rietbok-vliegtuig gesaboteer het nie en die saak is laat vaar.<\/p>\n\n\n\n

\u201cEk dink baie mense het reeds hul eie oortuigings oor die saak, en dit maak dit moeilik om almal tevrede te stel,\u201d s\u00ea hy.<\/p>\n\n\n\n

Die nuwe soektog na die Rietbok-wrak het sterk teenstand van sommige familielede ontlok, wat glo die terrein behoort as \u2019n \u201coseaan-begraafplaas\u201d beskerm te word. Die Vereniging van Families van die Rietbok-vliegtuigramp (Aforat) het ook aangedring dat toegang tot die wrak streng beheer word en dat slegs goedgekeurde partye daar mag duik.<\/p>\n\n\n\n

\n