{"id":318987,"date":"2026-06-01T08:53:21","date_gmt":"2026-06-01T06:53:21","guid":{"rendered":"https:\/\/novanews.co.za\/diepapier\/?p=318987"},"modified":"2026-06-01T08:53:22","modified_gmt":"2026-06-01T06:53:22","slug":"as-een-val-staan-tien-op-aktiviste-teen-tenderpreneurs-en-politiekery","status":"publish","type":"post","link":"https:\/\/novanews.co.za\/diepapier\/as-een-val-staan-tien-op-aktiviste-teen-tenderpreneurs-en-politiekery\/","title":{"rendered":"\u2018As een val, staan tien op\u2019: Aktiviste teen \u2018tenderpreneurs en politiekery\u2019"},"content":{"rendered":"\n

Vrydag se verwagte aanhoor van die Noord-Kaapse LUR van samewerkende regering, Bentley Vass, se hofaansoek om verskeie kwessies rakende die Sol Plaatje-munisipaliteit, is uitgestel glo omdat die premier\u00a0as party bygevoeg moet word.<\/p>\n\n\n\n

Die LUR se hofaansoek gaan daaroor om \u2019n raadsvergadering en \u2019n begroting van die Sol Plaatje-munisipaliteit in Kimberley wat ter tafel gel\u00ea is, nietig te verklaar, en \u2019n teenaansoek van die munisipaliteit om Vass se artikel 139-ingryping as onre\u00eblmatig te verklaar.<\/p>\n\n\n\n

Intussen, buite die hof, het \u2019n skermutseling op die sypaadjie van die hooggeregshof uitgebreek tussen \u2019n persoon wat as \u201ctenderpreneur\u201d uitgekryt is, en gemeenskapsaktiviste wat met plakkate betoog het. Polisielede moes tussenin tree en \u2019n vrou wat glo eerste \u2019n oorveeg wou uitdeel, wegsleep. Die strydende partye het \u2019n ruk lank op mekaar geskree.<\/p>\n\n\n\n

Die Kimberley Action Group-aktiviste en munisipale werkers, van wie die meeste staak weens hul teenkanting van die provinsie se ingryping, het aanvanklik vreedsaam buite die hof betoog.<\/p>\n\n\n\n

\"Aktiviste
Aktiviste Gerelaine White, Boyce Makodi en Lawrence Mkwakani van die Kimberley Action Group. Foto: Charn\u00e9 Kemp.<\/figcaption><\/figure>\n\n\n\n

Vrees uitgespreek<\/h2>\n\n\n\n

Hul ontevredenheid is teen die provinsiale ingryping by die raad en vrese is uitgespreek dat hulle soos ander aktiviste vermoor mag word. \u201cDit sal nie help nie, as een van ons val, staan tien op,\u201d het Boyce Makodi van die\u00a0Kimberley Action Group<\/a>\u00a0aan teenwoordiges ges\u00ea.<\/p>\n\n\n\n

Daar is met skok verwys na onlangse voorvalle waar aktiviste elders in die land \u201cwreed vermoor is,\u00a0 een wat 12 keer geskiet is en \u2019n ander wat met 17 skote doodgeskiet\u201d is.<\/p>\n\n\n\n

\u201cMaar ons sal nie stilbly of omgekoop word met kospakkies nie. Kiesers moet vir hulself begin dink, ek smeek julle.\u201d<\/p>\n\n\n\n

Volgens Makodi is die besluit om die munisipaliteit onder administrasie te plaas polities gedrewe en word dit deur tenderpreneurs gedryf wat hul hande op die munisipale geldkis wil l\u00ea.<\/p>\n\n\n\n

Die betogers voer aan die provinsiale ingryping is \u2019n \u201cberekende poging deur die provinsiale regering om beheer oor die munisipaliteit se administrasie en bankrekeninge te verkry.\u201d<\/p>\n\n\n\n

Dit is glo slegs daarop gemik om geld vir die ANC se komende verkiesingsveldtog te bekom. Makodi voer aan verlede jaar toe hy \u2019n Artikel 139-ingryping aan die ANC voorgestel het, was hulle daarteen gekant.<\/p>\n\n\n\n

\u201cHoekom nou, so kort voor die verkiesing?\u201d<\/p>\n\n\n\n