{"id":318632,"date":"2026-05-29T10:15:01","date_gmt":"2026-05-29T08:15:01","guid":{"rendered":"https:\/\/novanews.co.za\/diepapier\/?p=318632"},"modified":"2026-05-29T11:03:06","modified_gmt":"2026-05-29T09:03:06","slug":"dis-n-stink-storie-langebaners-betaal-dubbeld-vir-riooldienste","status":"publish","type":"post","link":"https:\/\/novanews.co.za\/diepapier\/dis-n-stink-storie-langebaners-betaal-dubbeld-vir-riooldienste\/","title":{"rendered":"D\u00eds \u2019n stink storie! Langebaners betaal dubbeld vir riooldienste"},"content":{"rendered":"\n

Terwyl inwoners van die Oystercatcher- en die Plover-ontwikkelings maandeliks hul munisipale heffing vir rioolverwydering betaal, moet hulle bykomend derduisende rande uit die sak haal om \u2019n kontrakteur te betaal om hul riool uit te pomp.<\/p>\n\n\n\n

Die krisis, wat reeds sedert 2023 voortsleep, het nou \u2019n kritieke punt bereik waar inwoners van di\u00e9 ontwikkelings agter die Curro-privaatskool self al R150 000 betaal het vir die uitpomp van riool, terwyl die rioolpompstasie steeds nie aan Eskom se kragnetwerk gekoppel is nie.<\/p>\n\n\n\n

Eddie Morrison, voorsitter van die trustees en landgoedbestuurder, het in \u2019n onderhoud met Weslander ges\u00ea die inwoners dra self by om \u2019n private kontrakteur sowat R2 600 per uur te betaal om die riool omtrent drie keer per week te kom uitpomp. \u201cOns betaal sedert 2023 \u2019n basiese rioolheffing aan die Saldanhabaai-munisipaliteit van R260 per maand, maar ons kry geen rioleringsdiens nie.\u201d<\/p>\n\n\n\n

Morrison waarsku dat as die situasie nie opgelos word nie, hulle moontlik inwoners se maandelikse eiendomsheffing tot R900 sal moet verhoog. \u201cOns word reeds verarm,\u201d het hy ges\u00ea.<\/p>\n\n\n\n

\"Die
Die riool loop gereeld by die opgaardam langs \u2019n private skool se sportterrein oor. Foto: Eddie Morrison.<\/figcaption><\/figure>\n\n\n\n

Goedkeurings sonder inspeksies<\/h2>\n\n\n\n

Die wortel van die probleem l\u00ea by goedkeurings wat blykbaar sonder behoorlike inspeksies gegee is.<\/p>\n\n\n\n

\u201cDie ontwikkeling is afgeteken sonder dat die SBM \u2019n inspeksie gehou het om te verseker dat die riooldienste in plek is,\u201d het Morrison verduidelik. Die groen lig is hierna aan die oorspronklike ontwikkelaar, Prime Growth Properties, gegee.<\/p>\n\n\n\n

Prime Growth het volgens Morrison allerhande beloftes gemaak wat nooit gebeur het nie. Die kernprobleem is dat die rioolpomp se elektriese verbinding nooit gefinaliseer is nie, ten spyte van herhaalde beloftes sedert 2024. Daar is bewerings dat Prime Growth nie die elektriese kontrakteur se rekening van ongeveer R80 000 betaal het sodat die pomp aan die elektriese netwerk gekoppel kon word nie.<\/p>\n\n\n\n

Gerhard Erasmus van Prime Growth Properties het in reaksie ges\u00ea dat hulle via hul elektriese ingenieur, Triocom, op 27 Julie 2022 by Eskom aansoek gedoen het om die konneksie. Eskom het die aansluiting goedgekeur en hulle het \u2019n kontrakteur aangestel om die kabel te l\u00ea. <\/p>\n\n\n\n

\u201cOns het die nodige fooi van R43 000 daarvoor betaal. Hulle het die punt, sonder iemand se medewete, verkeerdelik ge\u00efnstalleer. Prime Growth het vir 18 maande vir die konneksie betaal met die verstandhouding dat dit funksioneer,\u201d het Erasmus ges\u00ea.<\/p>\n\n\n\n

Hy het verduidelik dat Prime Growth intussen albei eiendomme, Plover \u00e9n Oystercatcher, aan ander ontwikkelaars verkoop het. Oystercatcher se erf is gekoop deur Kingpaul Investments, wat dit in 53 plot-en-plan-eenhede opgedeel en verkoop het. <\/p>\n\n\n\n

Plover se erf 10917 is gekoop deur Plover Property Development en in 35 plot-en-plan-eenhede opgedeel en verkoop. Al die eenhede is reeds oorgedra. \u201cKingpaul het self by die munisipaliteit aansoek gedoen om okkupasiesertifikate. Dit het niks met ons te doen gehad nie, dit is tussen hulle en die munisipaliteit,\u201d het Erasmus ges\u00ea.<\/p>\n\n\n\n

Hy het bevestig dat hy op Maandag 25 Mei weer \u2019n skrywe aan Eskom oor die kwessie gerig het.<\/p>\n\n\n\n