{"id":318069,"date":"2026-05-26T07:43:55","date_gmt":"2026-05-26T05:43:55","guid":{"rendered":"https:\/\/novanews.co.za\/diepapier\/?p=318069"},"modified":"2026-05-26T07:43:56","modified_gmt":"2026-05-26T05:43:56","slug":"hof-uitspraak-oor-staatshantering-van-bek-en-klouseer-bied-uiteindelik-hoop","status":"publish","type":"post","link":"https:\/\/novanews.co.za\/diepapier\/hof-uitspraak-oor-staatshantering-van-bek-en-klouseer-bied-uiteindelik-hoop\/","title":{"rendered":"Hof-uitspraak oor staatshantering van bek-en-klouseer bied uiteindelik hoop"},"content":{"rendered":"\n

Die uitspraak van die Gautengse hooggeregshof in Pretoria oor die hantering van die voortslepende en staatsbeheerde bek-en-klouseersiekte is \u2019n oorwinning vir elke vee- en wildboer in Suid-Afrika.<\/p>\n\n\n\n

In sy uitspraak wat vandag gelewer is, bevestig regter J. van der Westhuizen dat die minister van landbou, sy departement en senior amptenare nooit \u2019n geldige verweer gehad het nie, en verantwoordelik is vir die maandelange gesloer met \u2019n doeltreffende inentingsveldtog wat deur die privaatsektor gelei word, wat honderde boerderye laat struikel of vernietig het.<\/p>\n\n\n\n

In \u2019n verklaring s\u00ea die\u00a0Suider-Afrika Agri Inisiatief (Saai), \u2019n landboubelangenetwerk, dat die uitspraak ook \u2019n oorwinning is teen die onregverdige sentralisering van besluitneming, asook mag en uitvoering in die staat, wat lankal nie meer die vermo\u00eb het om veesiektes doeltreffend te bestry nie.<\/p>\n\n\n\n

Saai s\u00ea voorts die uitspraak is ook \u2019n oorwinning teen elke politieke party, die departement van landbou, landbou-organisasies, akademici en aktiviste wat kaderbeheer wou beskerm en bevorder.<\/p>\n\n\n\n

\"Verteenwoordigers
Verteenwoordigers van Saai, Sakeliga en Vrystaat Landbou saam met hul regsverteenwoordiging. Foto: Verskaf.<\/figcaption><\/figure>\n\n\n\n

\u201cDit is \u2019n oorwinning teen ongekontroleerde magsmisbruik wat onmeetbare materi\u00eble en emosionele skade aan veeboere veroorsaak het,\u201d aldus die verklaring.<\/p>\n\n\n\n

Saai beskou dit ook as \u2019n oorwinning teen organisasies waarin boere vertroue gehad het om hul belange te behartig, maar wat mettertyd meer krities teenoor die hofsaak gestaan het as teenoor die staat self.<\/p>\n\n\n\n

Sedert die uitbreek van bek-en-klouseer, veg Suid-Afrika se veesektor steeds teen di\u00e9 siekte wat dierebewegings ontwrig, handel be\u00efnvloed en onsekerheid vir boere skep. Teen hierdie agtergrond het die hooggeregshof in Pretoria op 11 Mei \u2019n dringende aansoek aangehoor, met uitspraak wat op Maandag, 25 Mei, gelewer is.<\/p>\n\n\n\n

LEES |\u00a0Vertragings in toedien van BKS-entstof kos boere miljoene, s\u00ea VL<\/a><\/h5>\n\n\n\n

Die saak het Sakeliga en landbou-organisasies betrek wat die regering se standpunt oor wie bek-en-klouseer-entstowwe mag toedien, betwis.<\/p>\n\n\n\n

\u201cN\u00e1 meer as \u2019n jaar se wegholverspreiding van die staatsbeheerde siekte, bied [die uitspraak] uiteindelik hoop dat die betrokkenheid en inisiatief van die private sektor die kritieke kapasiteit kan verleen om die siekte te stuit.<\/p>\n\n\n\n

\u201cSaai is verheug oor die oorwinning in die hof, maar ons harte gaan uit na diegene vir wie dit te laat gekom het, en wat reeds groot skade gely of selfs alles verloor het terwyl hulle vir die staat moes wag om entstof te bekom.\u201d<\/p>\n\n\n\n

Di\u00e9 belangenetwerk hoop dat die minister, sy departement en hul lojale ondersteuners in die landboubedryf die uitspraak sal aanvaar, en nie weer verder teen boere en hul verteenwoordigende organisasies sal werk om die bekampingspoging teen bek-en-klouseer te saboteer nie.<\/p>\n\n\n\n

Saai glo die uitspraak kan nou uiteindelik die veebedryf op die voorvoet plaas om die oorlog teen bek-en-klouseer te wen.<\/p>\n\n\n\n