{"id":317343,"date":"2026-05-19T13:54:41","date_gmt":"2026-05-19T11:54:41","guid":{"rendered":"https:\/\/novanews.co.za\/diepapier\/?p=317343"},"modified":"2026-05-19T13:54:43","modified_gmt":"2026-05-19T11:54:43","slug":"wesbank-inwoners-soek-antwoorde-na-vier-sterf-en-kind-gewond-is-in-skietery","status":"publish","type":"post","link":"https:\/\/novanews.co.za\/diepapier\/wesbank-inwoners-soek-antwoorde-na-vier-sterf-en-kind-gewond-is-in-skietery\/","title":{"rendered":"Wesbank-inwoners soek antwoorde n\u00e1 vier sterf en kind gewond is in skietery"},"content":{"rendered":"\n

Die polisie ondersoek vier moorde en een poging tot moord n\u00e1 \u2019n skietery in Wesbank naby Kuilsrivier, Saterdagaand, 16 Mei.<\/p>\n\n\n\n

Andr\u00e9 Traut, \u2019n provinsiale polisiewoordvoerder, het ges\u00ea die polisie is omstreeks 20:00 na Strandveldstraat ontbied, waar die beamptes op drie vroue en een man met skietwonde afgekom het. Die slagoffers was tussen 32 en 39 jaar oud.<\/p>\n\n\n\n

Paramedici het die slagoffers op die toneel dood verklaar.<\/p>\n\n\n\n

Volgens die polisie is \u2019n sewejarige kind, wat in die voorval gewond is, na \u2019n nabygele\u00eb mediese fasiliteit geneem.<\/p>\n\n\n\n

Traut het ges\u00ea die voorlopige ondersoek dui daarop dat die voorval moontlik bendeverwant is. Die omstandighede rakende die skietery word deur die polisie se eenheid vir ernstige en geweldsmisdaad ondersoek.<\/p>\n\n\n\n

\u2018Sinnelose slagting\u2019<\/h2>\n\n\n\n

Ebrahim Sawant, plaaslike wyksraadslid, het Maandag ges\u00ea hy is, net soos die gemeenskap, deur die veelvuldige moorde geskok. Sawant het dit as \u2019n \u201csinnelose slagting\u201d beskryf.<\/p>\n\n\n\n

Wesbank se inwoners leef in vrees en dring aan op ingryping. \u201cEk is nie net kwaad nie, maar ook gefrustreerd,\u201d het Sawant ges\u00ea. \u201cMy hart gaan uit na die families van die drie ma\u2019s en \u2019n pa wat sinneloos afgemaai is, asook die onskuldige seun wat tans in die hospitaal om sy lewe veg.\u201d<\/p>\n\n\n\n

Sawant het Maandag familielede van die afgestorwenes en die gewonde seun tuis besoek. Volgens inligting van die familie aan Sawant, is die gewonde seun nege jaar oud.<\/p>\n\n\n\n

LEES OOK:\u00a0Army joins police in major WC crime crackdown as Operation Prosper launches<\/a><\/h5>\n\n\n\n

Sawant het ges\u00ea \u2019n man, wat tydens dieselfde voorval gewond is, is ook tans in die hospitaal. Hy was versigtig oor bespiegeling oor bendes, maar het genoem dat daar Vrydagaand ook \u2019n skietery was.<\/p>\n\n\n\n

\u201cDie afgestorwenes was almal ouers van jong kinders. Die seun wat in die hospitaal is, se ma is dood,\u201d het Sawant ges\u00ea.<\/p>\n\n\n\n

Die gemeenskap eis antwoorde by wetstoepassers en ander owerhede te midde van die voortdurende bendegeweld en dodelike skietvoorvalle wat die woongebied teister.<\/p>\n\n\n\n

Daar is veral ongelukkigheid oor misdadigers wat kort nadat hulle in hegtenis geneem is, weer op straat is.<\/p>\n\n\n\n

Volgens Sawant sou soldate van die weermag ook in die gebied ontplooi word, maar niks het nog van di\u00e9 belofte gekom nie. \u201cDit is amper drie maande sedert die weermag ontplooi is en ons het hulle nog nie hier gesien nie.\u201d<\/p>\n\n\n\n