{"id":314637,"date":"2026-04-23T18:29:19","date_gmt":"2026-04-23T16:29:19","guid":{"rendered":"https:\/\/novanews.co.za\/diepapier\/?p=314637"},"modified":"2026-04-24T09:12:28","modified_gmt":"2026-04-24T07:12:28","slug":"ramaphosa-skors-masemola-se-reg-moet-sy-gang-gaan","status":"publish","type":"post","link":"https:\/\/novanews.co.za\/diepapier\/ramaphosa-skors-masemola-se-reg-moet-sy-gang-gaan\/","title":{"rendered":"Masemola-skorsing: \u2018Reg moet sy gang gaan\u2019"},"content":{"rendered":"\n

Die nasionale kommissaris van polisie, generaal Fannie Masemola, is voorlopig geskors. Di\u00e9 besluit is vanmiddag tydens \u2019n mediakonferensie deur President Cyril Ramaphosa bekendgemaak.<\/p>\n\n\n\n

Masemola het vroe\u00ebr vandeesweek in die hof verskyn op aanklagte dat hy die Wet op Openbare Finansi\u00eble bestuur (PFMA) oortree het. Di\u00e9 aanklagte hou verband met \u2019n beweerde onre\u00eblmatige tender aan die vermeende tenderpreneur, Vusi \u201cCat\u201d Matlala se maatskappy, Medicare24.<\/p>\n\n\n\n

Ramaphosa het ook aangekondig dat lt.genl. Puleng Dimpane in Masemola se plek sal waarneem as nasionale kommissaris.<\/p>\n\n\n\n

Dimpane het in 2007 by die polisie aangesluit en is sedert 2018 die hoof van finansies. Ramaphosa het die versekering gegee dat sy die steun van die topstruktuur geniet, en dat hy vol vertroue is dat haar aanstelling verdere momentum sal gee aan die SAPD se interne stryd teen korrupsie.<\/p>\n\n\n\n

Gesamentlike besluit<\/h2>\n\n\n\n

Volgens die president het hy en Masemola saam besluit dat dit in almal se beste belang sal wees as hy \u201cvoorkomend geskors\u201d word terwyl die aanklagte teen hom ondersoek word.<\/p>\n\n\n\n

Ramaphosa het benadruk dat dit belangrik is dat wetstoepassers hul werk sonder \u201cvrees of guns\u201d moet doen, en dat die besluit ook geneem is in belang van die moraal in die polisiediens.<\/p>\n\n\n\n

Ramaphosa kon \u2013 ingevolge artikel 8 van die Polisiewet \u2013 \u2019n raad van ondersoek instel om die bewerings teen Masemola te ondersoek.<\/p>\n\n\n\n

Dr. Johan Burger, voorheen van die Instituut vir Sekerheidstudies (ISS) en deesdae \u2019n onafhanklike konsultant oor misdaad en polisi\u00ebring, s\u00ea hy is \u201cteleurgesteld\u201d dat Ramaphosa nie \u2019n raad van ondersoek gaan instel om Masemola te ondersoek nie.<\/p>\n\n\n\n

\u201cOns ervaring in Suid-Afrika is dat strafsake herhaaldelik uitgestel word, en dat dit baie lank gaan neem voordat daardie saak afgehandel is. Teen daardie tyd het Masemola se kontrak waarskynlik reeds verstryk.\u201d<\/p>\n\n\n\n

Ramaphosa het wel ges\u00ea dat hy nie noodwendig sal wag vir die afhandeling van die strafsaak voordat hy \u2019n finale besluit oor Masemola se toekoms neem nie.<\/p>\n\n\n\n

DA: \u2018SAPD verkeer in krisis\u2019<\/h2>\n\n\n\n

Die DA het Masemola se skorsing verwelkom, en s\u00ea dis \u2019n \u201cnoodsaaklike stap om die integriteit van die amp te beskerm en te verseker dat die SAPD kan voortgaan om te funksioneer\u201d terwyl die proses sy gang gaan.<\/p>\n\n\n\n

Die DA het voorheen gevra dat \u2019n raad van ondersoek Masemola moet ondersoek, en s\u00ea in \u2019n mediaverklaring dat hulle hierdie versoek herhaal.<\/p>\n\n\n\n

\u201cErnstige bewerings (soos hierdie) vereis \u2019n volledige en behoorlike ondersoek sodat aanspreeklikheid nie vertraag, afgewater of stilweg vermy word nie.\u201d<\/p>\n\n\n\n

Volgens die party l\u00ea die jongste verwikkelinge die \u201cuiters kommerwekkende toestand van die SAPD se senior bestuur bloot.\u201d<\/p>\n\n\n\n

\u201cSuid-Afrikaners staar nou die buitengewone werklikheid in die gesig dat die minister van polisie, die nasionale kommissaris en \u2019n adjunk-nasionale kommissaris almal geskors of op verpligte verlof geplaas is.\u201d<\/p>\n\n\n\n

Dit is volgens die DA \u201cnie \u2019n teken van \u2019n gesonde polisiediens nie\u201d, maar van \u2019n instelling \u201cin \u2019n diepgaande krisis op die hoogste vlak\u201d.<\/p>\n\n\n\n

Twee adjunk-nasionale kommisarisse van die SAPD \u2013 Shadrack Sibiya en Francinah Vuma \u2013 is voorheen geskors en word tans deur die Madlanga-kommissie ondersoek vir beweerde korrupsie. Sibiya staar ook strafregtelike vervolging in die gesig.<\/p>\n\n\n\n