Zime ngxi izitalato zaseGugulethu ngethuba iqela lamakhwenkwe, nasele eshiywe lixesha, eqala indlela yawo esinga ebudodeni ngoLwesihlanu umhla wesibhozo kweyeNkanga.
Ukanti eli nyathelo lizise uvuyo kwizihlobo nezalamane zawo.
Ngokweengxelo, ngama 47 ooxholovane abasuka kwiingingqi ezahlukeneyo zephondo, kuquka nenye yawo esuka eMpuma Koloni, abathe baxhamla kule nyhweba.
Kubikwa ukuba la makhwekwe aphakathi kweminyaka engama 23 ukuya kuma 49 ubudala.
Lo myhadala, noqale ngakwiholo yoluntu yaseGugulethu iKhwezi, ubuququzelelwa ngumbutho ojongene nolwaluko ephondweni i-Somagwaza.
Omnye wabazali uMxolisi Makasi, nohlala kwindawo yamatyotyombe iKanana eGugulethu, uchaze eli phulo nanje ngeliluncedo kwiintsapho ezingathathi ntweni.
Onke lamakhwenkwe oluswe ngeemfefe zika Somagwaza, ngaphandle kokunyeka intlawulo.
“Lo bendimfaka ngumtshana wam uLusanda Ngoma (27) ohlala NY 21. Washiywa ngabazali bakhe kudala, ngoku akanamntu onokumnceda ukuba makoluke. Ndiye ndabona ukuba mandiluthathele kum elo xanduva. Ndiye ndaya kuSomagwaza ndacela uncedo,” uthethe watsho uMakasi.
Uchaze umseki walo mbutho nokwayingcibi uSiklela Zokufa nanje ngomntu owenza umsebenzi omkhulu kakukhu.
“Yanga uThixo angamsikela ngemisebenzi yakhe emikhulu ayenzayo. Nanjengoko negama lakhe inguSikelela. Akwaba uThixo unomgcina amandisele imihla yakhe yokuphila emhlabeni. Akakho umntu ebenoyenza lanto ayenzileyo,” utshilo.
Ukanti omnye wabazali John Nkomo waseMontana uye waqhwabela izandla uZokufa watsho esithi angayilahli lento ayiphathisiweyo.
“Le nkwenkwe ingenileyo uThabile Kulu (24) ayingowam kwaye andizalani naye. Yinkwenkwe nje yalapha esitratweni sam ezitsalela nzima. Nayo ayisenabazali kodwa bakhona oomakazi kunye nomalume wayo. Bonke ndaye ndabaxelela ngalombono wokufaka le nkwenkwe kuSomagwa kodwa abazange bayithathela ingqalelo lonto,” ucacise watsho uNkomo.
Funda ngokugqithisileyo | Bangaphaya kwamashumi ama50 ooxholovane abangenileyo ngale ntseni
Woleke ngelithi ibiseyilenkwenkwe ibimcenga ifuna ukungena.
Uqhube wathi waya kuyibhalisa kuluhlu lwamakhwenkwe aphuma kumakhaya angathathi ntweni kwi ofisi zikaSomagwaza.
U-Zokufa uye wabongoza abo bahlali bakwaziyo ukunceda ukuba baphose lonto banayo ukuzama ukukhawulelana nomgidi waba phopho “Kulindeleke ukuba lamakhwenkwe aphuma ngeCawe umhla we15 uze umgidi ubeNgomvulo uhla we 16 kweyoMnga. Bavumelekile abantu bangaphosa lonto umntu afikelelayo kuyo nokuba zikawusi, ibhulukhwe okanye ibhatyi,” ubongoze ngelitshoyo uZokufa.
Funda kwikhasi lesithoba.
