Izitalato zaseGugulethu bezime ngxi ngelixa igquba looxholovane liphahlwe ngamadoda esombela usomagwaza esiya ehlathini ngentseni yanamhlanje.
La makhwenkwe, nadityaniswe kwibala elingakwiholo loluntu iKhwezi eNY 2 kude kufuphi nodederhu lweevenkile laseGugulethu, aye asuka apho enza umngcelele ukuhla ngesitalato ukuya kwisitaloto iNY3, nalapho aye akhwela khona iloli ukuya kwihlathi elingakwisitishi sikaloliwe iJoe Gqabi.
La makhwenkwe, noninzi lawo luphuma kumakhaya angathathi ntweni, kulindeleke ukuba aphume ngeCawe umhla we 15 kwinyanga yoMnga, ze umgidi ube kusuku olulandelayo.
Ingcibi epheme izandla u-Sikelela Zokufa, nongumseki wombutho wolwaluko kaSomagwaza nomququzeleli weli phulo, uthe angaphaya kwama 50 amakhwenkwe angenileyo naphuma kwiingingqi ezahlukeneyo kweli le Ntshona Koloni, kuquka nenye esuka eMpuma Koloni.Uchaze iminyaka yawo nephakathi kwama 23 ukuya kwama 49.
U-Zokufa uchaze eli phulo nanje ngendlela Azama ngayo ukuncendisana neentsapho ezingathathi ntweni.
“Minyaka le, usuka ngomnyaka ka2022, sinephulo apho siye sincedisane neentsapho ezingathathintweni ekoluseni oonyana bazo. Zintsapho eziye zisitsalele umxeba zicele uncede. Thina siye sindwendwele ezi ntsapho ukuzama ukuqinisekisa nokujonga imeko yekhaya elo,” uthethe watsho uZokufa.
Omnye wabazali uLindile Vellem uchaze eli phulo nanje ngeliluncedo kakhulu, watsho esithi bebengazazi ukuba bazakumolusa ngantoni unyana wabo. Uye wabongoza abahlali ukuba baxhase eliphulo.
