Paaie dalk veiliger danksy handtekeninge

Motorongelukke in Bloemfontein bly ‘n reuse-probleem.

Op die Mangaung-metro se raadsvergadering op Donderdag 30 Oktober het die DA ‘n nuwe verordening voorgestel om padveiligheid vir motoriste, voetgangers en fietsryers te verbeter.

Dirk Kotzé, DA-raadslid, sê inwoners van Mangaung ervaar voortdurende uitdagings weens spoedoortredings, roekelose bestuur, dronkbestuur en onpadwaardige voertuie; benewens infrastruktuurkwessies soos slaggate, niewerkende verkeersligte en verbleikte padmerke.

“Die DA hou vol dat elke voorval van lewensverlies op ons paaie vermybaar is en beklemtoon die noodsaaklikheid van omvattende munisipale ingryping.”

Kotzé sê die verordening stel die volgende voor:

• Stel strenger strawwe en verhoogde boetes in vir roekelose bestuur.
• Magtig wetstoepassers om beslag te lê op voertuie wat as onveilig of ongelisensieer beskou word.
• Dwing ‘n verbod af op die gebruik van selfone ten tyde van die bestuur van ‘n voertuig.
• Stel verpligte gemeenskapsdiens in vir ernstige verkeersoortreders.
• Wy alle inkomste wat uit boetes en die skut van voertuie verkry word, uitsluitlik aan padherstelwerk, die vul van slaggate en die hernuwing van padmerke.
• Vul slaggate en herstel verkeersligte en naamborde; hou dit ook hierna in stand.
• Werf bykomende wetstoepassingsbeamptes en lei hulle ook op.
• Bedryf openbare opvoeding en bewusmakingsveldtogte gefokus op padveiligheid.
• Stel die gebruik van outomatiese spoed- en rooiligkameras in, tesame met digitale kaartjiestelsels, met die doel om handhawingsmaatreëls te verbeter.
• Bevorder aanspreeklikheid deur ‘n deursigtige padveiligheidsfonds en ook gereelde openbare verslagdoening.

Kotzé bevestig die suksesvolle aanvaarding van hierdie mosie vereis aktiewe betrokkenheid van die inwoners van Mangaung.

“Die DA het begin ‘n openbare versoekskrif waarin die raad aangemoedig word om die verordening op padveiligheid en -handhawing onmiddellik goed te keur om verdere lewensverlies te voorkom en algehele padveiligheid te verbeter.

“Elke handtekening is instrumenteel om munisipale optrede aan te moedig, gemeenskappe te beskerm en aanspreeklikheid te versterk.

“Inwoners word genooi om veiliger paaie vir Mangaung te ondersteun. Petisietafels sal in die komende weke in wyke stadswyd beskikbaar wees.”

Daar het reeds 2659 mense geteken. Teken die DA se versoekskrif hier.