{"id":43612,"date":"2024-06-13T06:02:21","date_gmt":"2024-06-13T04:02:21","guid":{"rendered":"https:\/\/novanews.co.za\/bloemnuus\/nuusman-laat-leemte-20240612-2\/"},"modified":"2025-03-20T06:32:03","modified_gmt":"2025-03-20T04:32:03","slug":"nuusman-laat-leemte-20240612-2","status":"publish","type":"post","link":"https:\/\/novanews.co.za\/bloemnewsexpress\/nuusman-laat-leemte-20240612-2\/","title":{"rendered":"Nuusman laat leemte"},"content":{"rendered":"\n

Hulde stroom in vir Mike van Rooyen (73), eertydse hoofverslaggewer en nuusredakteur van Volksblad <\/span>en joernalis wat as een van die bestes tot nog toe in die Vrystaat onthou sal word.<\/p>\n\n\n\n

Van Rooyen, wat n\u00e1 sy uittrede in 2015 by Volksblad<\/i><\/span>n\u00e1 bykans 40 jaar steeds as vryskut spesialishofverslaggewing vir Netwerk24 en Volksblad <\/span>diens gedoen het, is vroeg Vrydagoggend in die Mediclinic Bloemfontein aan kanker dood.<\/p>\n\n\n\n

Hy het tot onlangs nog die verslaggewing oor die verhoor n\u00e1 die moord op Louis Siemens, in lewe besturende direkteur van die CityMed-daghospitaal in Bloemfontein, behartig. Van Rooyen was by uitstek \u2019n spesialishofverslaggewer wat oor die dekades oor die meeste groot hofsake in die Vrystaat geskryf het. Sy kennis van die reg en joernalistiek het hom ook \u2019n gerespekteerde in die regsberoep gemaak. Regslui beskryf hom as \u2019n uitnemende hofverslaggewer wat die ingewikkeldste verhoor of geding feitelik korrek en helder in sy berigte weergegee het.<\/p>\n\n\n\n

Oudregter Faan Hancke van Bloemfontein s\u00ea: \u201cHy het oor verskeie hofsake waarin ek betrokke was rapporteer, en sy beriggewing was altyd korrek en foutloos.\u201d<\/p>\n\n\n\n

Van Rooyen, wat in 1976 by die koerant begin werk het, het oor groot gebeure soos die Virginia-slikdamramp, toe 12 jokkies op 12 April 1988 in \u2019n vliegongeluk in die Vrystaat dood is, die kol. Mike Hoare-huursoldaatdrama in die 1980\u2019s, die Laingsburg-vloed en die Reitz-4-verhoor verslag gedoen. Hy was oor dekades leermeester en mentor vir talle joernaliste wat by Volksblad<\/i><\/span>begin het. Dirk Kok, redakteur van Volksblad<\/span>, s\u00ea Mike was vir hom, soos vir soveel ander joernaliste, \u2019n nuushoof en mentor by uitstek. Maar hy was veel meer as Mike die gedugte nuusman. <\/p>\n\n\n\n

\u201cJy kan maar s\u00ea hy was vir baie van ons by Volksblad <\/span>soos \u2019n tweede pa. Hy het ons nie net van nuus geleer nie, maar ons geleer oor die lewe \u2013 en hy het ons deur dik en dun ondersteun,\u201d s\u00ea Kok.<\/p>\n\n\n\n

\u201cVolksblad <\/span>en die Volksblad-familie is armer sonder Mike. Hy leef voort in ons hart en gedagtes.\u201d<\/p>\n\n\n\n

Kaydene Davids, hofverslaggewer van Netwerk24 en Volksblad<\/span>, was die laaste tyd baie met haar mentor en vriend in kontak.<\/p>\n\n\n\n

\u201cMike, daar sal nooit genoeg woorde wees om dankie te s\u00ea vir wat jy vir my, nie net in my professionele lewe nie, maar ook in my persoonlike lewe, beteken het nie. Dankie vir al die jare se touwysmaak, jou mentorskap en vriendskap. Dankie vir die lekker koffie en geselsies langs jou eetkamertafel. Al die staaltjies, stories en wyse raad. Bowenal, dankie dat jy deur my bravade gesien het en vra wat\u2019s fout en daarna deur die gehuil my moed ingepraat het en wyse raad gegee het. Ek eer jou nalatenskap en sal voortbou op dit wat jy my geleer het. Mooi loop, Mike.\u201d <\/p>\n\n\n\n

Van Rooyen word deur sy dogter, Michelle Blaikie, oorleef. Sy en haar man, Sean, en seun, Leo (5), woon in Kelso, Skotland. Sy was betyds in Bloemfontein om die laaste dae saam met haar pa deur te bring. Hy word ook deur \u2019n suster, Marida Botha van Welkom, en \u2019n stiefdogter, Mandy Letnik van Johannesburg, oorleef. <\/p>\n\n\n\n